Ózbekstanda prezıdent synynan keıin 24 laýazymdy tulǵa qyzmetinen ketti
ASTANA. QazAqparat - Ózbekstanda Qarjy mınıstrliginiń 24 laýazymdy tulǵasy qyzmetinen ketti. Bul el prezıdenti Shavkat Mırzıeevtiń 22 jeltoqsandaǵy parlamentke Joldaýynda atalǵan mınıstrlik jumysyn qatań synǵa alǵannan keıin boldy, dep habarlaıdy ÓzA agenttigi.
Qarjy mınıstrliginiń ortalyq apparatynan basqarma bastyqtary jáne orynbasarlary, bólim basshylary, taǵy da 4 jaýapty qyzmetker jumystan bosatylǵan. Al 26 jeltoqsan kúni olardyń qataryna taǵy 8 memlekettik qyzmetshi qosylyp, qyzmetinen qýylǵandar sany jalpy 24-ke jetti.
Qyzmetinen bosatylǵandar arasynda Qazynashylyq bastyǵynyń orynbasary F. Nurmuhamedov, Býhgalterlik esep jáne aýdıt basqarmasynyń bastyǵy Sh. Haıdarov, Ónerkásiptiń bazalyq tarmaqtary jáne otyn-energetıka qarjysy basqarmasynyń bastyǵy mindetin atqarýshy A. Abdýllaev, Memlekettik qarjy baqylaýy bas basqarmasynyń orynbasary M. Agzamov, Salyq jáne kedendik tarıf saıasaty basqarmasynyń bastyǵy I. Golysheva, Memlekettik qarjy baqylaýy bas basqarmasynyń bólim bastyǵy B. Jumaevtar bar.
