Ózbekstanda prezıdent saılaýynda halyq merziminen buryn daýys berip jatyr

TAShKENT. QazAqparat - Ózbekstanda 28 maýsym men 5 shilde aralyǵynda prezıdent saılaýynda merziminen buryn daýys berý ótip jatyr, dep habarlaıdy QazAqparat tilshisi.

Eldiń saılaý kodeksine sáıkes, saılaý kúni, ıaǵnı 9 shildede turǵylyqty jeri boıynsha (issapar, demalys, emdeý, shetelge shyǵý jáne t.b.) bola almaıtyn saılaýshylarǵa óz tańdaýyn merziminen buryn jasaýǵa múmkindik beriledi.

Merziminen buryn daýys berý saılaýǵa on kún qalǵanda - 28 maýsymda bastalyp, jalpy daýys berý kúnine úsh kún qalǵanda - 5 shildede aıaqtalady.

OSK málimettinshe, saılaý ýchaskesinde merziminen buryn daýys berý ýaqyty jumys kúnderi 09:00-den 18:00-ge deıin, al demalys jáne mereke kúnderi 11:00-den 17:00-ge deıin.

Merziminen buryn daýys berýdi júzege asyrý úshin saılaýshy saılaý kúni bolmaý sebebin kórsete otyryp, ótinish negizinde ýchaskelik komıssııada saılaý bıýlletenin alady.

Tıisti ýchaskelik komıssııanyń keminde eki múshesiniń qatysýymen saılaýshy saılaý bıýlletenin saılaýshylar tiziminen alǵanyna qol qoıady.

Saılaýshy bıýlletendi jasyryn daýys berý kabınasynda toltyryp, ony konvertke salyp, jabystyrady.

Ýchaskelik komıssııanyń eki múshesiniń qolymen jáne komıssııanyń mórimen rastalǵan konvert 9 shildege deıin arnaıy seıfte saqtalady.

Buǵan deıin Ózbekstan prezıdenti Shavkat Mırzıeev 9 shildede memleket basshysyn merziminen buryn saılaý týraly jarııalaǵan bolatyn.