Ózbekstanda prezıdent ókilettigi 5-ten 7 jylǵa deıin uzartylmaq

TAShKENT. QazAqparat – Ózbekstanda eldiń Konstıtýtsııasyna ózgerister men tolyqtyrýlar engizý týraly zań jobasy referendýmǵa shyǵarylady. Joba «Halyq sózi» gazetinde jarııalandy, dep habarlaıdy QazAqparat.

Ózbekstannyń bas gazeti sanalatyn «Halyq sóziniń» 2022 jylǵy 25 maýsymdaǵy №133 nómirinde «Ózbekstan Respýblıkasynyń Konstıtýtsııasyna ózgerister men tolyqtyrýlar engizý týraly» Ózbekstan Respýblıkasynyń Konstıtýtsııalyq zańynyń jobasy jalpyhalyqtyq talqylaýǵa shyǵaryldy.

Eldiń qazirgi Konstıtýtsııasynyń 90-babyna sáıkes, prezıdenttiń ókilettik merzimi 5 jyl. Ári bir adam 2 retten artyq bul laýazymǵa saılana almaıdy. Referendýmda talqyǵa usynylǵan zań jobasy qabyldansa, prezıdenttiń merzimi 7 jylǵa uzartylady.

Atap aıtqanda, «90-baptyń ekinshi bóligindegi «bes» degen sóz «jeti» degen sózben aýystyrylsyn», - delingen qujatta.

Eldiń qazirgi Konstıtýtsııasy 128 baptan turady. Referendýmǵa usynylǵan zań jobasy boıynsha sonyń 64-ine ózgertýler men tolyqtyrýlar engizilip, 6 jańa bap qosylmaq.

Ózbekstan Prezıdenti Shavkat Mırzıeev Konstıtýtsııalyq komıssııa múshelerimen kezdesýde eldiń Ata zańyna referendým arqyly ózgerister engizýdi usynǵanyn buǵan deıin jazǵan bolatynbyz.

«Parlament ázirlegen jobany jalpyhalyqtyq talqylaýda qarastyryp, ony referendým arqyly qabyldaýdy usynamyn» , - degen edi Shavkat Mırzıeev.