Ózbekstanda perzenthanadan balany sán-saltanatpen shyǵarýǵa tyıym saldy
ASTANA. QazAqparat - Ózbekstannyń Densaýlyq saqtaý mınıstrligi náresteniń jaryq dúnıege kelýin sán-saltanatpen atap ótý balanyń da, onyń anasynyń da densaýlyǵyna keri áserin tıgizetindigin aıtýda, dep habarlaıdy QazAqparat.
«Balanyń jaryq dúnıege kelýi árbir otbasy úshin úlken baqyt. Bul oqıǵany otbasylar árqalaı atap ótip jatady. Olardyń keıbiri perzenthana úıiniń aldynan da bastalady. Árıne, sábıdiń dúnıege kelýi jáne onyń úıine shyǵýyn atap ótý erekshe oqıǵa ekendigi sózsiz. Alaıda, muny sán-saltanatqa aınaldyryp, qorshaǵan ortanyń nazaryn aýdartyp, olardyń tynyshtyǵyn buzyp jatsa ne bolmaq? Eń jamany bul sharalar ana men jańa týǵan sábıdiń densaýlyǵyna teris áserin tıgizip jatsa ne bolmaq», - dep atap ótilgen Ózbekstan Densaýlyq saqtaý mınıstrliginiń baspasóz qyzmeti taratqan aqparatta.
Osyǵan oraı Ózbekstan densaýlyq saqtaý mınıstrligi bala dúnıege kelgen kezde asyra sán-saltanatymen erekshelenetin dástúrler men joralǵylardyń aldyn alý maqsatynda arnaıy is-sharalar josparyn ázirlegen.
«Memleket basshysy atap ótkendeı, úılený toıyn nemese basqa da sharalardy ótkizý - bul jeke bastyń ǵana isi emes, ol áleýmetke jáne barlyq qoǵamǵa da qatysty. Mundaı sharalar otbasylyq sanalǵanymen búkil qoǵamǵa, adamdardyń ómirine de áserin tıgizedi. Aqpan aıynda sáıkesinshe mınıstrliktermen, vedomstvolarmen jáne uıymdarmen yntymaqtastyqta bala dúnıege kelýine oraı sán-saltanaty kelisken sharalardyń aldyn alý jónindegi is-sharalar jospary bekitildi. Medıtsına qyzmetkerleri jańa ádister negizinde azamattarmen suhbattasyp, aǵartýshylyq jáne túsindirý jumystaryn júrgizetin bolady. Túsindirý jumystarynyń eski ádisteri búginde ózin ózi aqtamaı otyr. Sondyqtan da medıtsınalyq mekemelerde akýsher-gınekologtarmen, otbasylyq dárigerlermen, medbıkelermen tyǵyz yntymaqtastyqtamyz. Júkti áıeldermen, enelerimen jeke sóılesýdemiz. Biz medıtsınalyq turǵyda bala dúnıege kelgen kezdegi sán-saltanatty sharalar balanyń da, onyń anasynyń da densaýlyǵyna teris áser etetindigin túsindirýge tyrysamyz», - dedi Ózbekstan Densaýlyq saqtaý mınıstri Alısher Shadmanov.
