Ózbekstanda parlament saılaýy ótip jatyr
TAShKENT. KAZINFORM – Ózbekstanda saǵat 8.00-de Zań shyǵarý palatasyna (parlamenttiń tómengi palatasy) jáne oblys, qala men aýdan kengashtarynyń depýtattaryn saılaý bastaldy, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Birinshi bolyp Japonııa men Ońtústik Koreıadaǵy elshilikter janynan qurylǵan saılaý ýchaskeleri ashyldy. Jalpy ýchaskeler sany - 10 717, onyń 56-sy 39 shet memlekette. Daýys berý 20:00-ge deıin jalǵasady.
Aıta ketsek, bıyl parlament saılaýy tuńǵysh ret proportsıonaldy-majorıtarlyq júıemen ótedi. Partııalarǵa saılaýaldy úgit-nasıhatty 26 shildeden bastap júrgizýge ruqsat etildi.
16-23 qazan aralyǵynda merziminen buryn daýys berý uıymdastyryldy, onda saılaýshylar tizimine engizilgen 19,9 mln ózbekstandyqtyń 1 mıllıonnan astamy óz tańdaýyn jasady.
Eske salsaq, parlament saılaýyna 5 partııa qatysyp jatyr: Ózbekstannyń lıberaldyq-demokratııalyq partııasy, Ózbekstannyń ekologııalyq partııasy, Halyqtyq-demokratııalyq partııa, «Mıllı tıklanısh» demokratııalyq partııasy jáne «Adolat» sotsıal-demokratııalyq partııasy.
Buǵan deıin habarlaǵanymyzdaı, Ózbekstandaǵy parlament saılaýynda keıbir ýchaskelerge elektrondyq daýys berý júıesi engizildi.