Ózbekstanda «Ózbekǵarysh» ǵarysh agenttigi qurylady
TAShKENT. ÓzA-QazAqparat – Ózbekstanda «Ózbekǵarysh» ǵaryshtyq zertteýler jáne tehnologııalar agenttigi qurylady. Bul týraly «QazAqparat» HAA ÓzA agenttigine silteme jasap habarlaıdy.
«Elde ǵaryshtyq zertteýler jáne tehnologııalar salasynda jerdi qashyqtan zondtaý, spýtnıktik baılanys, navıgatsııalyq júıe syndy qyzmetter múldem derlik júzege asyrylmaıdy. Olar aýyl jáne sý sharýashylyǵy, ekologııa, telekommýnıkatsııa, geologııalyq barlaý, kartografııa, meteorologııa, seısmologııa jáne qala qurylysy sııaqty salalarda tıimdilikti arttyrýǵa múmkindik beredi.
Eldiń odan arǵy turaqty damýy úshin qolda bar ǵylymı-tehnıkalyq áleýetti tıimdi iske asyrý maqsatynda, sonyń ishinde ekonomıkanyń túrli salalarynda ınnovatsııalyq ǵarysh tehnologııalaryn paıdalaný jolymen, sondaı-aq Ózbekstan Respýblıkasynyń qaýipsizdigin qamtamasyz etý maqsatynda Ózbekstan Respýblıkasynyń Mınıstrler kabınetiniń janynan Ǵaryshtyq zertteýler jáne tehnologııalar agenttigin («Ózbekǵarysh») qurýdy tapsyramyn», - delingen el Prezıdenti Shavkat Mırzıeevtiń qaýlysynda.
Qujatta atap ótilgendeı, «Ózbekǵarysh» agenttiginiń negizgi mindeti ǵaryshtyq zertteýler jáne tehnologııalar salasynda biryńǵaı memlekettik saıasat pen strategııalyq baǵyttardy, Ózbekstan Respýblıkasynda ǵarysh salasyn damytýdyń memlekettik baǵdarlamasyn ázirlep, iske asyrý, sondaı-aq ǵarysh salasynyń ınfraqurylymyn jasaý bolyp tabylady.
