Ózbekstanda ótken kórmede Qazaqstannyń ulttyq stendi joǵary baǵalandy
ASTANA. QazAqparat - Qazaqstannyń Syrtqy saýda palatasy Tashkent qalasynda «Saýda men ınvestıtsııany damytýdaǵy jańa kókjıekter» uranymen ótken VIII Ortalyq-Azııalyq saýda forýmyna qatysty, dep habarlaıdy palatanyń baspasóz qyzmeti.
Forým aıasynda kólik, týrızm, aqparattyq tehnologııalar, jabdyq, jemis-kókónis ónimderin óndirý jáne qaıta óńdeý jáne taǵy basqalaryn qosa alǵanda, aımaqtyń túrli salalaryn kórsetetin ortalyq-azııalyq óńir kompanııalarynyń qatysýymen saýda kórmesi bolyp ótti.
Búkil óńir boıynsha kólik, týrızm, aqparattyq tehnologııalar, jabdyq, jemis-kókónis ónimderin óndirý jáne qaıta óńdeý jáne basqalaryn qosa alǵanda, túrli sektorlardan 100-den astam kásiporyndar óz ónimderi men qyzmetterin usyndy.
Saýda kórmesinde Qazaqstan biryńǵaı Ulttyq stendpen usynylyp, oǵan qurylys, mashına jasaý sektoryndaǵy, kabel-ótkizgish ónimderi, metallýrgııa, agroónerkásip sektory, halyqtyq tutyný taýarlary, jeńil ónerkásip, tamaq ónimderi, sondaı-aq medıtsınalyq baǵyttaǵy zattar sektorlaryndaǵy 29 qazaqstandyq taýar óndirýshiler qatysty.
Kórmeniń negizgi maqsaty tikeleı baılanystardy retteý, qazaqstandyq kásiporyndar men áleýetti satyp alýshylar arasyndaǵy saýda-sattyq qatynastaryn belsendirý jáne bıznes toptardyń ekijaqty kezdesýlerin uıymdastyrý bolyp tabylady.
Kórme kezinde qazaqstandyq óndirýshilerge olardyń ónimderine qyzyǵýshylyq tanytqan taraptardan usynystar túse bastady, bul bolashaqta óndiristi damytýǵa jáne ózara tıimdi yntymaqtastyq kókjıegin keńeıtýge múmkindik beredi.
Qazaqstannyń Ulttyq stendin kórýge forým uıymdastyrýshylarynyń ókilderi - Ortalyq Azııadaǵy USAID mıssııasynyń óńirlik dırektory Krıstofer Edvards, Qazaqstandaǵy AQSh Bas konsýly Erık Maıer, Ózbekstan Respýblıkasyndaǵy AQSh Elshiliginiń isteri jónindegi ýaqytsha senimgeri Alan Melttser, sondaı-aq Ózbekstan Respýblıkasy Premer-mınıstriniń orynbasary Nodır Otajanov keldi.
Forýmdy uıymdastyrýshylar Qazaqstan usynǵan stendterdiń joǵary sapasyn, kórnekiligin jáne aqparattyq syıymdylyǵyn baǵalady. Kompanııalar zamanaýı standarttarǵa jaýap beretin joǵary sapaly ónim óndiretin senimdi bıznes-seriktester retinde kazaqstandyq óndirýshilerdiń ımıdjin odan ári nyǵaıtýǵa óz úlesterin qosa aldy.
