Ózbekstanda ótken qaıta daýys berýge elektorattyń 80 paıyzy qatysty - Ortalyq saılaý komıssııasy
TAShKENT. Qańtardyń 11-i. QazAqparat /Qurmat Samarhan/ - Ózbekstannyń Ortalyq saılaý komıssııasyna Olıı Majlıstiń tómengi palatasyna depýtattar saılaý boıynsha ótken qaıta daýys berýdiń aldyn ala málimetteri kelip tústi,
dep habarlady komıssııanyń baspasóz qyzmetinen.
Jeksenbi, qańtardyń 10-y kúni 39 saılaý okrýginde Ózbekstan Respýblıkasy Olıı Majlısiniń tómengi palatasyna jáne 779 saılaý okrýginde memlekettik bıliktiń jergilikti ókiletti organdaryna depýtattar saılaý boıynsha qaıta daýys berý ótti.
Ortalyq saılaý komıssııasynyń málimetteri boıynsha, qaıta daýys berý ótkizilgen 39 saılaý okrýginiń tizimderine engizilgen 4,9 mıllıonnan astam saılaýshynyń 3,9 mıllıony, ıaǵnı 79,7 paıyzy daýys berdi.
Daýys berý jalpyǵa birdeı halyqaralyq normalar men standarttardyń negizinde ulttyq saılaý zańnamasynyń barlyq normalary saqtala otyryp, ashyq jáne jarııa túrde ótti.
Komıssııaǵa eshqandaı shaǵym túsken joq, dep habarlady baspasóz qyzmetinen.
