Ózbekstanda otbasylyq janjal úshin ajyrasatyndardy tatýlastyrýǵa shekteý qoıylmaq
TAShKENT. KAZINFORM – Ózbekstanda turmystyq zorlyq-zombylyqqa baılanysty ajyrasý kezinde sot tarapynan tatýlasýǵa ýaqyt berý tártibin alyp tastaý josparlanyp otyr, dep habarlaıdy Kazinform agenttiginiń menshikti tilshisi.
Atalǵan bastama Ózbekstan Senatynyń jastar, áıelder, mádenıet jáne sport komıtetiniń otyrysynda talqylandy.
Depýtattardyń usynysyna saı, eger sotta qaralatyn iste turmystyq zorlyq-zombylyqtan zardap shekken jábirlenýshi bolsa, onda taraptarǵa tatýlasý múmkindigi berilmeýi tıis. Óıtkeni, únemi janjal bolatyn otbasylardy májbúrlep saqtaýdyń aqyry aýyr zardaptarǵa alyp kelýi yqtımal.
Ózbekstannyń qazirgi zańnamasyna saı, ajyrasýǵa aryz bergen erli-zaıyptyǵa tatýlasý úshin 6 aıǵa deıin ýaqyt beriledi.
Eske salaıyq, byltyr 10 aıda Ózbekstan sottary turmystyq zorlyq-zombylyq qylmystaryn jasaǵan 15 826 adamdy jaýapqa tartty.
Sonymen qatar kóp áıel alýdy nasıhattaǵan jáne adamdy jynysyna baılanysty kemsitken 21 ózbekstandyq jaza arqalady.
Buǵan qosa, byltyrdan bastap Ózbekstanda balaǵa qatysty jasalǵan turmystyq zorlyq-zombylyq úshin jaza engizildi.