Ózbekstanda otasqanyna bir jyl tolmaǵan erli-zaıyptylardyń ajyrasýyna shekteý engizilmek
TAShKENT. KAZINFORM – Ózbekstannyń Otbasy jáne áıelder komıteti nekeni buzý tártibine ózgeris enizý jáne otbasyn saqtap qalýdy yntalandyrýǵa baǵyttalǵan zań jobasyn qoǵamdyq talqylaýǵa shyǵardy, dep habarlaıdy Kazinform agenttiginiń Tashkenttegi menshikti tilshisi.
Jobada sottyń erli-zaıyptylarǵa tatýlasý úshin beretin merzimin qazirgi 6 aıdan 1 jylǵa deıin uzartý usynylǵan. Sot otbasyn saqtap qalý boıynsha shara qabyldaý úshin 3 kún ishinde mahallıalardyń tatýlastyrý komıssııasyna «Elektrondyq úkimet» júıesi arqyly habarlama joldaýǵa mindetti.
Sondaı-aq qujatta AHAJ organdary arqyly ajyrasý tártibi naqtylandy. Eger balalary joq erli-zaıyptylar ózara kelisim negizinde nekeni buzýǵa ótinish joldasa, onda olardyń shańyraq kótergen ýaqytynan bastap keminde 1 jyl ótýi tıis. Bul norma otbasylyq zorlyq-zombylyq jaǵdaılaryna áser etpeıdi, tıisinshe olar bólek tártippen qaralady.
Munymen birge, Azamattyq is júrgizý kodeksine de ózgeris engizilmek. Endi neke qııý sátinen bastap 1 jyl ótpegen otbasylardyń ajyrasý týraly aryzyn sottar qaraýsyz qaldyra alady.
Eske salaıyq, byltyr Ózbekstanda týý kórsetkishi tómendedi.
Buǵan deıin habarlaǵanymyzdaı, 2025 jyly Ózbekstanda jeńgetaılyqpen aınalysqan 2 myńnan astam adam jazalandy.
Sonymen qatar, Ózbekstanda Ádep kodeksin buzǵan 60-qa jýyq sýdıanyń ókilettigi merziminen buryn toqtatyldy.
