Ózbekstanda otandyq fılmder kórsetildi
ASTANA. KAZINFORM — Tashkentte «Ortalyq Azııa: ortaq rýhanı-aǵartýshylyq mura — ortaq bolashaq» atty Halyqaralyq kongress aıasynda Ortalyq Azııa elderi men Ázerbaıjan kıno kúnderiniń saltanatty ashylýy ótti. Bul týraly elimizdiń Mádenıet jáne aqparat mınıstrligi habarlady.
Іs-shara Ulttyq kınoóner saraıynda uıymdastyrylyp, oǵan Ortalyq Azııa memleketteri men Ázerbaıjannyń ǵylymı jáne mádenı orta ókilderi, óner qaıratkerleri men jas kóshbasshylary qatysty.
Baǵdarlama aıasynda kórermenge qazirgi qazaqstandyq kınoındýstrııanyń tańdaýly týyndylary usynyldy. Atap aıtsaq, «Jambyl. Jańa dáýir» tarıhı fılmi, prokatta bir mıllıard teńgeden astam tabys jınaǵan «Qaitadan» dramasy, 2024 jylǵy Paralımpıada oıyndarynyń kúmis júldegeri Erǵalı Shámeev týraly qysqametrajdy «Úmit sáýlesi», sondaı-aq ómirindegi qıyndyqtardy eńbek pen jigerdiń kúshimen eńsergen kókparshy qyz Eva Jıgalınanyń ómiri negizinde túsirilgen «Eva – Batyr qyz» kórkem týyndysy. Ár fılm ózbek kórermeniniń ystyq yqylasyna bólenip, týyndylardyń mazmuny men kóterilgen taqyryptary joǵary baǵalandy.
«Jambyl. Jańa dáýir» fılmi kórsetilimine Ózbekstan Kınoagenttiginiń dırektory Shýhrat Rızaev arnaıy qatysty. Ol rejısser Jandos Qusaıynovtyń eńbegin baǵalap, onyń kásibı sheberligin atap ótti. Sonymen qatar ol rejısserdi Qazaqstan men Ózbekstannyń aldaǵy birlesken jobalaryna qatysýǵa shaqyrdy.
Halyqaralyq kongress baǵdarlamasy aıasynda qazaqstandyq rejısserler «Ózbekfılm» stýdııasynyń pavılondaryn aralady. Aıta ketý kerek, stýdııada túrki jáne arab kıimderinen bastap túrli saýyttarǵa deıingi rekvızıt pen kostıým kollektsııasy bar. Bul tarıhı janrdaǵy jobalar úshin aıryqsha qyzyǵýshylyq týdyrdy. Mundaı jumys saparlary mamandarǵa birlesken jobalardyń egjeı-tegjeıin talqylaýǵa, tájirıbe almasýǵa jáne kásibı baılanystardy nyǵaıtýǵa múmkindik beredi. Osy arqyly elder arasyndaǵy mádenı yntymaqtastyqtyń jańa kókjıekteri ashylady.
Sonymen birge kongress aıasynda Qazaqstan, Ázerbaıjan, Qyrǵyzstan, Tájikstan, Túrikmenstan jáne Ózbekstan kıno uıymdarynyń basshylary qatysqan dóńgelek ústel ótti. Taraptar elder arasyndaǵy yntymaqtastyqty keńeıtý, birlesken kınojobalardyń áleýeti, ulttyq kınony halyqaralyq deńgeıde damytý jáne kınoóner arqyly gýmanıtarlyq baılanysty nyǵaıtý máselelerin talqylady.
Jıynda erekshe nazar koprodýktsııaǵa qolaıly jaǵdaı jasaýǵy, kásibı tájirıbe almasý men Ortalyq Azııa elderi men Ázerbaıjan arasyndaǵy mádenı dıalogty damytý baǵyttaryna aýdaryldy.
Aıta keteıik, 14 qarasha kúni Tashkent qalasynda ótken Ortalyq Azııa elderiniń mádenıet mınıstrleriniń alǵashqy kezdesýinde Aıda Balaeva kreatıvti ónimderdiń biryńǵaı marketpleısin qurýdy usyndy.