Ózbekstanda ortasha jalaqy 150 myń teńgege jetpeıdi

TAShKENT. QazAqparat - Jyl basynan bergi statıstıka boıynsha ózbekstandyqtardyń ortasha nomınaldy jalaqysy 3,4 mıllıon sýmdy (136 689 teńge) qurady, dep habarlaıdy QazAqparat ÓzA agenttigine silteme jasap.

Statıstıka komıtetiniń habarlaýynsha, 2022 jyldyń qańtar-naýryz aılarynda Ózbekstanda ortasha aılyq ataýly jalaqy 3 mln 426,8 myń sým (ótken jyldyń qańtar-naýryzynda – 2 mln 876,4 myń sým) bolǵan.

Bul 2021 jyldyń sáıkes kezeńimen salystyrǵanda 19,1 paıyzǵa joǵary.

Bıylǵy jyldyń birinshi toqsanynda eń joǵary ortasha aılyq jalaqy bank, saqtandyrý, lızıng jáne nesıe deldaldyq qyzmetinde baıqalǵan – 8,4 mıllıon sým (335 139 teńge).

Aqparat jáne baılanys salasynda ortasha aılyq jalaqy 6,5 mıllıon sým, tasymaldaý jáne saqtaý salasynda - 4,5 mıllıon sým, ónerkásip salasynda - 4,4 mıllıon sým, qurylys boıynsha - 4,1 mıllıon sým, saýda-sattyq - 3,5 mıllıon sým, bilim salasynda – 2,5 mıllıon sýmdy quraǵan.

Eń tómengi ortasha jalaqy densaýlyq saqtaý jáne áleýmettik qyzmet kórsetý salasynda tirkeldi – 2,3 mıllıon sým (91 764 teńge).

Aımaqtar boıynsha eń joǵary ortasha aılyq jalaqy kórsetkishinde Tashkent qalasy kósh bastap turǵan bolsa (5,2 mıllıon sým), eń tómengi ortasha jalaqy Ferǵana oblysyna týra keledi (2,5 mıllıon sým).