Ózbekstanda Ortalyq Azııanyń rýhanı muralary jaıly halyqaralyq kongress ótip jatyr
TAShKENT. KAZINFORM – Búgin Tashkentte «Ortalyq Azııadaǵy rýhanı mura jáne aǵartýshylyq» halyqaralyq kongressi bastaldy, dep habarlaıdy Kazinform agenttiginiń menshikti tilshisi.
Aýqymdy is-sharaǵa kórshiles elderden 1 myńnan astam delegat keldi. Halyqaralyq kongress Ózbekstan astanasynda jańadan ashylǵan Islam órkenıeti ortalyǵynda ótip jatyr.
Qazaqstannyń ulttyq akademııalyq kitaphanasy atalǵan ortalyqqa 60-tan astam kitapty syıǵa tartty. Týyndylardyń deni Abaı shyǵarmalary men qazaq tarıhyna arnalǵan.
– Barlyq kitaphanamen ózara týyndy almasý boıynsha jumys júrgizip jatyrmyz. Búginge deıin 40 astam memorandýmǵa qol qoıdyq. Sondaı-aq elektorondyq formatty da damytý ústindemiz, - dedi is-sharaǵa qatysqan QR Ulttyq akademııalyq kitaphanasynyń dırektory Kúmis Seıitova.
Búginde áleýmettik jelilerde tarıhty burmalaý arqyly ulttyń bedeline nuqsan keltiretin jalǵan aqparattar kóbeıdi. Tarıhshylardyń buǵan qatysty pikiri ortaq. Árbir oqıǵa ǵylymı negizdemege súıene otyryp, shynaıy baıandalýy tıis.
– Osy baǵyttaǵy artyq áńgimelerge tyıym salý qajet. Jalpy, kásibı tarıhshylar arasynda mundaı burmalaý joq. Degenmen keıbir azamattar toby osyndaı dúnıelermen aınalysyp jatyr, - dedi kongress aıasynda BAQ ókilderine suhbat bergen tarıh ǵylymynyń doktory Búrkit Aıaǵan.
Kongress jumysy 4 kúnge jalǵasady. Onyń barysynda Ortalyq Azııa jáne Ázerbaıjannyń mádenıet pen óner maıtalmandary, ǵalymdary men tarıhshylary ózara pikir almasyp, ortaq usynystar ázirleıdi.
Qosa keteıik, taıaýda Mustafa Shoqaı jaıly kitap ózbek tilinde jaryq kórdi.