Ózbekstanda oqýshylarǵa meshitke barýǵa tyıym salynady
ASTANA. QazAqparat - Ózbekstan bıligi oqýshylarǵa jazǵy demalys kezinde meshitterge barýǵa tyıym salady. Mamyr aıynyń basynda Ándijan oblysyndaǵy oqýshylardyń ata-analary bilim mınıstrliginiń jergilikti bólimshelerinen jazǵy demalys kezinde oqýshylarǵa tyıym salynatyn ister jóninde «kepil hat» alǵan, dep jazady centralasian.org.
Bul qujattyń kóshirmesin Azattyqtyń ózbek qyzmeti jarııalady. Hatta ata-analar balalarynyń tártipti bolýyn, dinı aǵymdarǵa ilesip ketpeýin, meshitterge baryp qulshylyq etpeýin qadaǵalaýy tıis delingen (sońǵy eki eskertpeniń asty syzyp belgilengen).
Mektep oqýshylaryna sonymen birge qaıyr tileýge, benzın satýǵa, bazarda jumys isteýge jáne avtokólikterdi jýyp aqsha tabýǵa tyıym salynady.
Bilim mınıstrliginiń hatyna qol qoıǵan ata-analardyń balalary keshki saǵat 18:00-den keıin eresekterdiń qaraýynsyz úılerinen shyǵyp ınternet, oıyn klýbtaryna bara almaıdy.
Olaı bolmaǵan jaǵdaıda ata-analar zańǵa sáıkes jazalanady delingen. Bul hat meshit qyzmetkerlerine de jiberilgen. Máselen, Ándijan oblysynyń meshitterinde «Balalarǵa kirýge tyıym salynady» degen jazýlar ilinip qoıǵan.
