Ózbekstanda nesıe jarnamasyna mindetti eskertý engiziledi
ASTANA. KAZINFORM — Ózbekstanda nesıe men mıkrokredıt jarnamasynda qaryzdy ótemeýge baılanysty qarjylyq táýekelder týraly eskertý mindetti bolady.
«Jarnama týraly» zańǵa engizilgen ózgeristerge sáıkes, qarjylyq táýekelder týraly eskertý jarnamanyń jalpy kóleminiń keminde 10 paıyzyn qamtýy kerek. Atalǵan talap jarnamanyń kórneki bóligine de, aýdıo jáne beınerolıkterdiń uzaqtyǵyna da qatysty bolady.
Bul bastama halyqtyń qarjylyq saýatyn arttyrýǵa, nesıe alýǵa jaýapkershilikpen qaraý mádenıetin qalyptastyrýǵa jáne shamadan tys qaryzǵa batýdyń aldyn alýǵa baǵyttalǵan.
Buǵan deıin Ózbekstannyń Básekelestik komıteti mıkrokredıt pen tutynýshylyq nesıe naryǵynyń keńeıip, halyqtyń qaryz júktemesi artqanyn habarlaǵan.
Vedomstvonyń málimetinshe, mundaı qyzmetterdiń jarnamasynda nesıe alýdyń ońaı ekeni jıi nasıhattalady, alaıda oǵan baılanysty qarjylyq táýekelder tolyq túsindirilmeıdi.
Eske sala keteıik, buǵan deıin QR Densaýlyq saqtaý mınıstrligi balalarǵa arnalǵan fastfýd jarnamasyn shekteýdi usynǵany habarlanǵan bolatyn.
