Ózbekstanda Naýryz merekesin toılaý bastaldy
TAShKENT. QazAqparat - Ózbekstanda Ulystyń uly kúni Naýryzǵa oraı saltanatty sharalar, oıyn-saýyqtar bastalyp ketti, dep habarlaıdy «QazAqparat» HAA-nyń Ózbekstandaǵy menshikti tilshisi.
Alǵashqylar qatarynda Tashkent oblysynyń Qazaqstanmen shektesip jatqan Shynaz aýdany merekeni bastady. Aýdanda negizinen ózbekter, qazaqtar, sondaı-aq basqa da ult ókilderi turady.
Shynazdyqtar bıyl Naýryzǵa erekshe daıyndaldy. Oıyn-saýyq ótip jatqan ortalyq stadıon merekege saı etip bezendirildi. Halyq mýzykalyq aspaptarynyń daýsy jańǵyryp, sýmalak, hálim, kóksamsa sııaqty ulttyq taǵamdar men salt-dástúrler qonaqtarǵa tartyldy.
Aýdan ákimdigi daıyndaǵan mýzykalyq jáne kórkemdik kompozıtsııalar tabıǵattyń oıanýy men kópten kútken kóktemniń kelgenin baıandaǵandaı.
Shynaz aýdanynyń ákimi Akmalhan Mádıev jınalǵan jurtty merekemen quttyqtady. «Shynaz aýdany Qazaqstanmen shektesip jatyr. Kópultty aýdanymyzda 30-dan astam ult jáne ulys ókilderi tatý-tátti ómir súrip keledi. Olardyń barshasy úshin Naýryz - ortaq ulttyq meıram. Keshe ǵana Qazaqstanda Ózbekstan jyly bastalǵany óte qýanyshty oqıǵa boldy. Sonyń arqasynda baýyrlas Qazaqstanmen baılanystarymyz odan ári nyǵaıa túsýde. Oǵan shynazdyqtardyń da qýanyshynda shek joq», - deıdi ákim.
Naýryzǵa arnalǵan merekelik baǵdarlama aıasynda boks, karate jáne kúrestiń kishkentaı sheberleri óner kórsetti.
Erekshe aıta keterligi, Sútbulaq aýylynan kelgen jas qazaq ónerpazdardyń ásem bıleri men quıqyljyta salǵan ánderi jınalǵandardy tamsandyrdy. Al Naýryzǵa arnaıy tigilgen appaq kıiz úıde qonaqtarǵa et, baýyrsaq, naýryzkóje sekildi qazaqtyń ulttyq taǵamdary tartyldy.
