Ózbekstanda metro stantsııasynda alaqandy skanerleý arqyly tóleý júıesi iske qosyldy
Tashkent qalasy ákimshiligi aqparat qyzmetiniń habarlaýynsha, alaqandy skanerleý arqyly tólem júıesi Tashkent metrosynyń «Halyqtar dostyǵy» stantsııasynda alǵash ret iske qosyldy, dep habarlaıdy Kazinform Ózbekstannyń UzA agenttigine silteme jasap.
Endi Tashkent metrosyn paıdalanǵan kezde jol aqysyn tóleý úshin bank kartalaryn nemese QR-kod paıdalanýdyń qajeti joq. Ótkelde UZINFOKOM kompanııasynyń Palm ID jańa bıometrııalyq joba – tamyrlardyń sýretine negizdelgen sáıkestendirý jobasy iske qosyldy.
Siz alaqanyńyzdy skanerdiń ústinde ustasańyz, júıe sizdi ıdentıfıkatsııalaıdy. Sizden tólem avtomatty túrde alynady. Ol úshin aldyn ala birneshe mınýt jumsap, baǵdarlama arqyly jeke derekterińizdi engizýińiz kerek.
Qoǵamdyq kólikti paıdalanýshylarǵa arnalǵan mobıldi qosymsha da iske qosyldy. Mobıldi qosymsha arqyly vırtýaldy karta ashylyp, aqshamen toltyrylady. Osydan keıin siz alaqanyńyzben jáne eshqandaı ınternet, karta nemese QR-kodsyz tólem jasaı alasyz.
