Ózbekstanda meshitter tótenshe jaǵdaılarda habar taratý quralyna aınalady

ASTANA. KAZINFORM — Birikken Ulttar Uıymynyń Damý baǵdarlamasy Ózbekstannyń Tótenshe jaǵdaılar mınıstrligimen birlesip tótenshe jaǵdaılar kezinde erte eskertý júıesiniń qamtýyn keńeıtýge baǵyttalǵan ınnovatsııalyq tehnıkalyq sheshimdi engizdi.

Pılottyq bastama aıasynda eldi mekenderge jaqyn ornalasqan meshitterge arnaıy qurylǵylar ornatylyp jatyr. Bul TJM shuǵyl habarlamalaryn meshitterdegi daýys zoraıtqyshtar arqyly taratýǵa jáne keń aýdıtorııaǵa tez habarlaýǵa múmkindik beredi. 

Búginde qurylǵylar Ózbekstannyń jeti oblysyndaǵy 272 meshitke ornatyldy: Jızaq, Qashqadarııa, Namanǵan, Samarqan, Syrdarııa, Tashkent jáne Ferǵana.

— Meshitterdi tańdaý kezdeısoq emes: olar dástúrli túrde jergilikti qaýymdastyqtarǵa aıtarlyqtaı áser etetin bedeldi áleýmettik ınstıtýttar retinde qabyldanady. Budan basqa, meshitter barlyq derlik eldi mekenderde ornalasqan jáne 500-den 2000 metrge deıingi estý qashyqtyǵyn qamtamasyz etetin joǵary qýatty syrtqy dınamıktermen jabdyqtalǵan, — dep habarlaıdy Ózbekstandaǵy BUUDB baspasóz qyzmeti. 

Jobanyń esepteýlerine sáıkes, meshitter arqyly taratý erler, áıelder, balalar jáne osal toptar sııaqty shamamen 6,5 mln adamdy qamtı alady.

Bul eskertý arnasynyń qosymsha artyqshylyǵy — uıaly telefon nemese elektr qýaty óshken jaǵdaıda da tótenshe jaǵdaılar týraly habarlamalardy jiberý múmkindiginde.

Budan buryn Qazaqstan men Ózbekstan Syrdarııa ózenine sýdy esepke alatyn qurylǵylardy ornatyp jatqany málim boldy.