Ózbekstanda meshitte joıqyn jarylys bolyp, úsh adam qaza tapty

ASTANA. KAZINFORM – Búgin, 31 naýryz kúni saǵat 12:19-da Ózbekstannyń Ándijan oblysy, Іzbasqan aýdanyndaǵy meshit aýmaǵyndaǵy dárethanada gaz-aýa qospasynan joıqyn jarylys boldy. Bul týraly eldiń Tótenshe jaǵdaılar mınıstrligi habarlady. 

Habarda oqıǵa ornyna birden eki qutqarý toby men eki órt sóndirý jáne qutqarý brıgadasy jetkeni aıtylǵan.

Dárethananyń qabyrǵasy men shatyrynyń qurylymdaryna zaqym kelgen, biraq órt shyqpaǵan.

Jarylys saldarynan 3 adam qaza taýyp, 10 adam jaralanyp, aýrýhanaǵa jetkizilgen.

Qazir bul oqıǵaǵa qatysty aldyn ala tergeý amaldary júrgizilip jatyr, dep qosty vedomstvo.

Ózbekstan bıligi iri AES salý múmkindigin qarastyryp jatqanyn jazǵan bolatynbyz.