Ózbekstanda memlekettik mekemeler men ekonomıka nysandary balamaly energııamen jabdyqtaýǵa kóshedi
TAShKENT. QazAqparat – Ózbekstanda memlekettik mekemeler, ekonomıka jáne úı sharýashylyǵy nysandary kezeń-kezeńimen balamaly energııamen jabdyqtaýǵa kóshedi. Bul týraly Ózbekstan prezıdenti Shavkat Mırzıeev jańartylatyn energııa kózderin paıdalanýdy keńeıtý jónindegi keńeste málimdedi, dep habarlaıdy QazAqparat menshikti tilshisi respýblıka basshysynyń baspasóz qyzmetine silteme jasap.
Prezıdent qazirdiń ózinde halyq kem degende 2-3 mlrd kVt/saǵ elektr energııasyna qajettilikti sezinetinin, al taıaýdaǵy bes jylda bul suranys taǵy da 10 mlrd kVt/saǵatqa ósetinin atap ótti. Sondyqtan balamaly energııa kózderin engizý óte mańyzdy.
«Ózbekstan jylyna 10 mlrd dollarǵa elektr energııasy men gaz tutynady. Eger biz onyń 10%-yn únemdeýdi úırensek, osy 1 mlrd dollardy basqa qajettilikterge jumsaı alamyz», - dedi Shavkat Mırzıeev.
Ózbekstan basshysy Mendeleev atyndaǵy hımııa-tehnologııalyq ýnıversıtetiniń Tashkent fılıalyn mysalǵa keltirdi. Onda 2021 jyly qýattylyǵy 100 kVt bolatyn kún elektr jabdyqtary ornatylǵan, jylyna 200 myń kVt/saǵ elektr energııasy óndiriledi. Sonyń arqasynda shamamen 2 mıllıard som únemdeledi. Osyǵan baılanysty joǵary bilim mınıstrligine bul tájirıbeni 2022 jyly barlyq joǵary oqý oryndarynda engizý tapsyryldy.
Mundaı jabdyqty áleýmettik ınfraqurylym obektilerinde de ornatatyn bolady. Jyl sońyna qaraı bılik 2107 balabaqshany, 1000 mektepti, 1000-nan astam emhana men otbasylyq medıtsına pýnktterin, 200 sanatorııdi kún panelderimen jáne sý jylytqyshtarmen jabdyqtaýdy josparlap otyr.
Prezıdent mınıstrlikter men vedomstvolardyń, hokımııattardyń, mahalleılerdiń ǵımarattaryn da balamaly energııaǵa kóshirýdiń ýaqyty kelgenin atap ótti.
«Mınıstrlikter men vedomstvolarǵa elektr jáne jylý energııasyna jumsalatyn shyǵyndardy keminde 25%-ǵa qysqartý jóninde baǵdarlama ázirleý tapsyryldy. Qarjy mınıstrligi jyl qorytyndysy boıynsha shyǵyndardy tómendetpegen basshylarǵa qatysty sharalar qabyldaý boıynsha usynystar engizedi», - dep atap ótti Shavkat Mırzıeev.
Sondaı-aq, 2023 jyldan bastap SOO, meıramhanalar, janarmaı quıý beketteri, áýejaılar, bankter jáne basqa da nysandar jańartylatyn energııa kózderi esebinen ystyq sý men syrtqy jaryqtandyrýdy tutynýdyń keminde 25%-yn jabýǵa mindetti.
