Ózbekstanda memlekettik medıtsınalyq saqtandyrýdyń ilki jobasy engizilýde
TAShKENT. QazAqparat – 1 shildede Ózbekstannyń Syrdarııa oblysynda densaýlyq saqtaý júıesi men memlekettik medıtsınalyq saqtandyrý mehanızmderin uıymdastyrýdyń jańa modelin engizý boıynsha ilki joba iske qosylmaq, dep habarlaıdy QazAqparat tilshisi.
Bul týraly Syrdarııa oblysyna press-týrda jýrnalısterge Ózbekstannyń Memlekettik medıtsınalyq saqtandyrý qorynyń ókilderi aıtty.
«Saqtandyrý medıtsınasyn engizýdegi negizgi maqsat – halyqqa medıtsınalyq kómek kórsetýdiń sapasy, tıimdiligi men qoljetimdiligin arttyrý, alǵashqy medıtsınalyq-sanıtarııalyq kómek kórsetýdiń aýqymyn keńeıtý, atalmysh salaǵa jańa qarjy tetikterin kezeń-kezeńmen engizý, medıtsınalyq qyzmet naryǵynda zamanaýı básekeles ortany qalyptastyrý, halyqtyń kepildi jáne sapaly medıtsınalyq kómek alý múmkindigin qamtamasyz etý», - dedi prezentatsııa barysynda qor dırektory Farrýh Sharıpov.
Syrdarııa oblysy ákimdigindegi brıfıngte medıtsınalyq saqtandyrý qorynyń ókilderi óńirdiń medıtsınalyq reformalar aldynda turǵanyn aıtty. Pılottyq joba 2021 jyldyń shildesinen bastap 2022 jyldyń aıaǵyna deıin júzege asyrylady. Ol mynadaı 5 komponetten turady: medıtsınalyq qyzmet kórsetýdi jetildirý, densaýlyq saqtaýdy basqarý, densaýlyq saqtaýdy qarjylandyrý, jobalardy tsıfrlandyrý jáne basqarý.
«Densaýlyq saqtaý júıesin uıymdastyrýdyń jańa modelin engizý medıtsınalyq qyzmet sapasyn naýqastardyń qarajatynsyz kóterýge múmkindik beretindigi qýantady. Ár adam óz densaýlyǵyn qorǵaý quqyqtaryn bilip, kepildi memlekettik qyzmetter paketin qoldanýy kerek.
Medıtsınalyq-sanıtarııalyq alǵashqy kómek kórsetý (MSAK) salasyn reformalaý boıynsha búrynǵy jasalǵan ister elde oń nátıje kórsetip úlgerdi. Nátıjesinde MSAK-tyń geografııalyq qoljetimdiligi keńeıip, tipti aýyldyq jerlerdi qosty.
Degenmen áli aýyl men qalalardaǵy halyqtyń densaýlyǵyn jaqsartý maqsatynda sapaly medıtsınalyq kómekti qoljetimdi etip, teńsizdikti jeńý úshin kóptegen juystar atqarý qajet», - dep tolyqtyrdy Syrdarııa oblysy densaýlyq saqtaý basqarmasynyń basshysy Rýstam ıÝldashev.
Eske sala keteıik, Ózbekstanda Memlekettik medıtsınalyq saqtandyrý qory 2020 jyldyń 12 qarashasynda quryldy. Syrdarııa oblysyndaǵy memlekettik medıtsınalyq saqtandyrý júıesi pılottyq joba nátıjesine saı 2023 jyly Ózbekstannyń ózge óńirlerine kezeń-kezeńmen engiziledi dep kútilýde.
Avtory Mádıbek Jánibekov
