Ózbekstanda lańkestik uıymǵa qosylmaq bolǵandar ustaldy

Ándijan oblysynyń úsh turǵyny lańkestik uıymǵa qosylmaq bolǵan. Memlekettik qaýipsizdik qyzmetiniń málimetinshe, olar Túrkııaǵa mıgranttardy jumysqa ornalastyratyn fırma arqyly baryp, sol jerden Sırııaǵa ótýdi josparlaǵan.

Kazinform agenttigi bul týraly Gazeta.uz saıtyna silteme jasap habarlaıdy. 

Er adam Telegram jelisinde Ábý Valıd esimdi bireýmen baılanysqa shyǵyp, onyń tapsyrmasy boıynsha messendjerde arnalar men toptar quryp, onda úgit-nasıhat jumystaryn júrgizgen. Osydan keıin ol kórshisi I.D.-men kelise otyryp, Sırııaǵa ketip, onda «Katıba taýhıd val jıhad» lańkestik uıymynyń qataryna qosylýdy josparlady. Jaqyn dosyn da ózimen birge ketýge shaqyrdy.

«Olar ózderine nazar aýdartpaý úshin Túrkııada mıgranttardy jumysqa ornalastyratyn jekemenshik kompanııaǵa júgindi. Túrkııaǵa jetken soń Sırııaǵa kóshýdi josparlady», - delingen habarlamada.

Ustalǵan er adamdarǵa qatysty qylmystyq is qozǵaldy.