Ózbekstanda qurylys alańyn shańdatqandar endi aıyppul arqalaıdy

TAShKENT. KAZINFORM – Ózbekstan Senaty alańdy shańdatyp, qurylys júrgizetinderge aıyppul salatyn zań jobasyn maquldady, dep habarlaıdy Kazinform agenttiginiń menshikti tilshisi. 

Senatorlar qurylys alańdarynda boraıtyn shań men qum aýa sapasyna teris áser etip jatqanyn atap ótti. Statıstıkaǵa sáıkes, 500 sharshy metr aýmaqtan 50 tonnaǵa deıin shań kóteriledi.

Bul rette Ózbekstan zańnamasynda dál osyndaı áreketter úshin kinálilerdi jaýapqa tartatyn norma joq. Sondyqtan depýtattar atalǵan máseleni quqyq sheńberinde retteýge basymdyq berip otyr.

Tıisinshe, senatorlar 500 sharshy metrdi qamtyp jatqan qurylys alańyn shańdatqan laýzymdy tulǵalarǵa 10 bazalyq eseptik shama (145 myń teńge) mólsherinde aıyppul salatyn zańdy maquldady. Eger bir jyl ishinde osyndaı quqyq buzýshylyq qaıtalansa, onda aıyppul somasy 50 bazalyq eseptik shamaǵa (729 myń teńge) deıin ulǵaıady.

Eske salaıyq, Ózbekstannyń iri qalalarynda qorshaǵan ortaǵa zalal keltiretin kásiporyndardy ashýǵa tyıym salynady. Sonymen qatar, Tashkent pen Núkis shaharlarynda ornalasqan iri óndirister alys aýmaqtarǵa kóshiriledi.

Buǵan deıin Ózbekstanda aýa sapasy nasharlaǵanda iri kásiporyndardyń jumys ýaqyty shektelýi múmkin ekenin habarlaǵan bolatynbyz.