Ózbekstanda Qurban aıtqa oraı 10 myń balaǵa jasalatyn ota shyǵyndaryn memleket óteıdi
TAShKENT. KAZINFORM — Ózbekstanda Qurban aıt merekesi qarsańynda halyqtyń osal toptaryna qoldaý kórsetiledi. Atqarylatyn is-sharalar týraly prezıdent Shavkat Mırzıeevke tanystyryldy, dep habarlaıdy Kazinform agenttiginiń Tashkenttegi menshikti tilshisi.
Jınalysta málim bolǵandaı, saldary múgedektikke ulasýy múmkin aýyr dertke shaldyqqan 10 myń balaǵa jasalatyn ota shyǵyndaryn memleket óteıdi. Sondaı-aq, onkologııalyq, gematologııalyq, onkogematologııalyq dıagnoz qoıylǵan 2 300 naýqastyń medıtsınalyq tekseristen ótýine, emdelýine jáne operatsııasyna qarajatty úkimet baǵyttaıdy. Munymen birge baýyr men búırek transplantatsııasyn kútip júrgen 350 adamǵa tegin ota jasalady.
El shebin qorǵaý kezinde qaza tapqan áskerı qyzmetshilerdiń balalaryna, ata-anasynyń qamqorlyǵynsyz jáne jetim qalǵan 8 myńnan astam búldirshinge 200 dollardan beriledi. Áleýmettik az qamtylǵan otbasylar, jalǵyz turatyn qarttar men arnaıy kútimge muqtaj múgedektigi bar adamdarǵa azyq-túlik taratylady.
Buǵan qosa 500 meshittiń dáret bólmeleri jóndeýden ótip, zırat aýmaqtarynda abattandyrý jumysy júrgiziledi. Bul is-sharalar «Vakf» qoǵamdyq qaıyrymdylyq qorynyń esebinen qarjylandyrylady.
Eske salaıyq, Ózbekstanda Qurban aıtqa 5 kún demalys bereledi. ıAǵnı, turǵyndar 27 mamyrdan 31 mamyrǵa deıin demalady.
