Ózbekstanda kitap oqyǵany úshin túrmede otyrý merzimi qysqartylady

ASTANA. KAZINFORM – Ózbekstan Senaty kitap oqyǵany úshin sottalǵandardyń jazasyn jeńildetý týraly zań jobasyn maquldady.

Qylmystyq kodeks 74-1-bappen tolyqtyryldy, onda adamnyń túzý jolǵa túsýine baılanysty jaza merzimin qysqartý kózdelgen. Atap aıtqanda, árbir oqylǵan kitap úshin jaza merzimi úsh táýlikke qysqartylýy múmkin, biraq jylyna otyz kúnnen aspaıdy.

Bul rette sottalǵan adam Respýblıkalyq rýhanı-aǵartý ortalyǵy bekitken ádebıetter tizimindegi kitaptardy oqýy kerek. Sonymen qatar komıssııanyń qorytyndysy negizinde atalǵan kitaptardy oqý faktisin rastaý qajet bolady.

Senator Abdýsaıd Kýchımovtiń atap ótýinshe, qylmyskerlerdiń kitaptyń arqasynda qalypty ómirge oralǵany týraly kóptegen mysal bar.

- Birqatar shet elde sottalǵandardy kitappen arnaıy yntalandyryp, olardyń túzelýi jáne týra jolǵa túsýi úshin ádebıet syıǵa tartylady, – dedi senator.

Aıta ketý kerek, atalǵan ereje shartty túrde merziminen buryn bosatýǵa quqyǵy bar adamdarǵa ǵana qatysty. Bul shara ómir boıyna bas bostandyǵynan aıyrylǵandarǵa qoldanylmaıdy.

Ózgeris eldegi 13,5 myńnan astam sottalýshyǵa qatysty bolady.

Buǵan deıin Tájikstan halqyna «Shahnamanyń» jańa basylymy tegin taratylatynyn jazǵan bolatynbyz.