Ózbekstanda kitap oqyǵany úshin sottalǵandardyń jaza merzimi qysqarýy múmkin

TAShKENT. KAZINFORM — Ózbekstandyq depýtattar kitap oqyǵany úshin sottalǵandardyń jaza merzimin qysqartýǵa múmkindik beretin zań jobasyn talqylap jatyr, dep habarlaıdy Kazinform agenttiginiń menshikti tilshisi.

UzA aqparat agenttiginiń málimetinshe, bul tájirıbeni engizý bastamasyn «Mıllıı tıklanısh» (Ulttyq jańǵyrý) partııasy fraktsııa otyrysynda kóterdi.

— Zań jobasy sottalǵandardyń ishki mádenıetin kóterip, túrmelerdegi rýhanı-aǵartýshylyq jumysty jetildirýdi kózdeıdi. Atap aıtqanda, arnaıy sheshimmen bekitiletin kitaptardy oqyp, sonyń negizinde emtıhan tapsyrǵan sottalýshylardyń jaza merzimin qysqartýǵa baǵyttalǵan. Máselen, bir eńbekti oqyǵany úshin ótelmegen merzim 3 kúnge kemıdi. Bul rette shekteý de bar, ıaǵnı sottalǵandar jylyna 10 kitaptan kóp shyǵarma oqyp, emtıhan tapsyra almaıdy, — dedi «Mıllıı tıklanısh» partııasynyń múshesi Bahodır Mamathanov.

Ádebıetter tizimin Respýblıkalyq rýhanııat jáne aǵartý ortalyǵy bekitedi. Sarapshylardyń aıtýynsha, atalǵan bastama sottalǵandardy tıimdi ońaltýǵa yqpal etedi.

Eske salaıyq, byltyr Ózbekstan prezıdenti Konstıtýtsııa kúnine oraı 483 adamǵa raqymshylyq jasady.

Sonymen qatar, 2024 jyly sáýirde Oraza aıt qarsańynda Ózbekstan prezıdenti Shavkat Mırzıeev 426 adamǵa raqymshylyq jasaǵan edi.