Ózbekstanda kitap oqyǵany úshin áskerdegi qyzmet merzimi qysqarýy múmkin
ASTANA. KAZINFORM — Ózbekstan Olıı Májilisiniń Zań shyǵarý palatasy áskerı qyzmetti óteý tártibin jetildirýdi kózdeıtin zań jobasyn birinshi oqylymda qabyldady.
Zań jobasyna sáıkes, respýblıkalyq kitap oqý baıqaýynda joǵary nátıje kórsetken sarbazdardyń áskerı qyzmet merzimi bir aıǵa qysqartylady.
Bul shara áskerı qyzmetshiler arasynda kitap oqýdy nasıhattaýǵa, olardyń ádebıetke degen qyzyǵýshylyǵyn arttyrýǵa, sondaı-aq sarbazdardyń rýhanı jáne zııatkerlik áleýetin damytýǵa baǵyttalǵan.
Qujat ushqyshtar daıarlaıtyn otandyq jáne sheteldik joǵary áskerı oqý oryndarynyń túlekterimen jańa kelisimshart jasasýdyń quqyqtyq negizderin aıqyndaýdy kózdeıdi.
Aıta keteıik, Qazaqstan Qarýly kúshterinde kitap oqý mádenıetin damytýǵa baǵyttalǵan talap engizilgen. Oǵan sáıkes, árbir sarbaz merzimdi áskerı qyzmet barysynda keminde bes kitap oqýǵa mindetti.
Buǵan deıin Ózbekstan Senaty kitap oqyǵany úshin sottalǵandardyń jaza merzimin qysqartýdy kózdeıtin zań jobasyn maquldaǵan bolatyn. Qujatqa sáıkes, árbir oqylǵan kitap úshin jaza merzimi úsh kúnge qysqartylady.
