Ózbekstanda kisi ólimi qylmysynyń 40%-ǵa jýyǵy otbasylyq janjal saldarynan bolǵan
TAShKENT. KAZINFORM – 2023 jyly jasalǵan 363 kisi óltirý oqıǵasynyń 141-i nemese 38,8 paıyzyna otbasylyq janjaldar sebep bolǵan. Bul týraly Ózbekstan Olıı Majlısi Senaty qorǵanys jáne qaýipsizdik komıtetiniń otyrysynda málim boldy, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Senattyń taldaýyna saı, asa aýyr qylmystar otbasylyq qıynshylyqtar men janjaldardy ýaqytynda sheshe almaý nátıjesinde jasalady. Osyǵan baılanysty Іshki ister mınıstrligi, Jumyspen qamtý jáne kedeılikti azaıtý mınıstrligi, Otbasy jáne áıelder isteri komıteti, sondaı-aq Jastar isteri agenttigimen birlese atqarylǵan jumystyń arqasynda áleýmettik kómekke muqtaj 6 634 áıel qyzmetke ornalastyryldy. Buǵan qosa, olardyń 11 myńǵa jýyǵyna medıtsınalyq, materıaldyq jáne áleýmettik qoldaý kórsetilgen.
Turmystyq zorlyq-zombylyq qurbany bolǵan 40 myńnan astam áıelge qorǵaý orderi berildi. Profılaktıkalyq is-sharalardyń kómegimen 17 327 januıa tatýlasyp, 1 450 áıel ońaltý jáne beıimdeý ortalyqtaryna ornalastyryldy.
Sonymen qatar, otyrys barysynda kóterilgen mańyzdy máseleniń biri – kámeletke tolmaǵandar arasyndaǵy qylmystardyń aldyn alý. Máselen, jasóspirimder jasaǵan qylmystar sany byltyr 5,3%-ǵa ósken. Sondyqtan atalǵan baǵytqa asa mán berý tetikteri talqylandy.
Ózbekstandyq senatorlar jol-kólik oqıǵasy meselesin de nazardan tys qaldyrmady. Byltyr bul eldiń aýmaǵynda 9 839 kólik apaty tirkelip, odan 9 209 azamat zardap shegip, 2 282 adam qaza tapty. Al balalardyń qatysýymen 1 794 jol-kólik oqıǵasy bolyp, 1 568 bala zardap shekti jáne 263 bala kóz jumdy.
