Ózbekstanda krıptoaktıvterdi zańsyz satyp alǵandarǵa qatysty jaza engizildi
TAShKENT. KAZINFORM – Ózbekstanda krıptoaktıvterdi zańsyz satyp alǵandar endi ákimshilik jaýapkershilikke tartylady. Tıisti zańǵa el prezıdenti Shavkat Mırzıeev qol qoıdy, dep habarlaıdy Kazinform agenttiginiń menshikti tilshisi Álıhan Asqar.
Qujatqa saı, krıptovalıýtany zańsyz satyp alǵan, ótkizgen nemese aıyrbastaǵan, provaıder qyzmetin lıtsenzııasyz júzege asyrǵandar 15 táýlikke deıin qamalady. Al qamaýǵa alý sharasy qoldanylmaıtyn azamattar sanatyna 20-30 bazalyq eseptik shama (251-377 myń teńge) aralyǵynda aıypul salynady.
Provaıderlerdiń kómegimen anonımdi krıptoaktıv operatsııalaryn júrgizgen laýazymdy tulǵalar 30-dan 40 bazalyq eseptik shamaǵa deıin (377-503 myń teńge aralyǵy) aıyppul arqalaıdy.
Zańmen belgilengen tártipti buza otyryp, maınıng qyzmetin júzege asyrǵandarǵa mynadaı jaza qoldanylady: 5 táýlikke deıin ákimshilik qamaqqa alý nemese jabdyqtaryn tárkileý. Al qamaýǵa alýǵa bolmaıtyn tulǵalar 20-30 bazalyq eseptik shama (251-377 myń teńge) aralyǵynda aıyppul tóleýi tıis.
Buǵan qosa, anonımdi krıptoaktıvterdi óndirýmen aınalysqandardyń krıptoaktıvteri men jabdyqtary tárkilenedi, al laýazymdy tulǵalarǵa 30-dan 40 bazalyq eseptik shamaǵa deıin (377-503 myń teńge aralyǵy) aıyppul salynady.
Sondaı-aq zańda jazylǵandaı, uıaly telefonnyń halyqaralyq biregeı sáıkestendirý kodyn óndirýshiniń ruqsatynsyz ózgertýge jáne ol úshin arnaıy baǵdarlama ázirleýge, taratýǵa, ony paıdalanýǵa tyıym salynady. Mundaı quqyq buzýshylyq úshin 15-ten 20 bazalyq eseptik shamǵa deıin (188-251 myń teńge aralyǵy) aıyppul salynady.
Al óndirýshiniń nemese ıesiniń ruqsatynsyz SIM kartanyń kóshirmesin jasaǵan jáne oǵan ózgeris engizgender 20 bazalyq eseptik shama (251 myń teńge) kólemindegi aıyppulmen jazalanady.
