Ózbekstanda koronavırýsqa qarsy vaktsına 3 ret egiledi

TAShKENT. ÓzA - QazAqparat - Ózbek-qytaı ǵalymdary birlesip jasaǵan ZF-UZ-VAC2001 vaktsınasy úsh ret egiledi. Bul týraly QazAqparat ÓzA-ǵa silteme jasap habarlaıdy.

Ózbekstan men Qytaı ǵalymdary birlesip jasaǵan ZF-UZ-VAC2001 vaktsınasyn úsh ret qabyldaǵannan keıin azamattar tolyq vaktsınatsııalanǵan bolyp sanalady.

Sanıtarlyq-epıdemıologııalyq jáne qoǵamdyq densaýlyq saqtaý qyzmeti basshysynyń orynbasary Batyr Qýrbanovtyń eldegi vaktsınatsııa jaǵdaıy týraly BAQ ókilderine suhbat berdi.

Onyń aıtýynsha, Ózbekstanda 3-kezeńdik klınıkalyq synaqtardan sátti ótken Qytaıdyń «Zhifei Longcom Biopharmaceutical Co. Ltd» kompanııasy men ózbek mamandary birlesip jasaǵan ZF-UZ-VAC 2001 vaktsınasy azamattarǵa úsh ret egilgende olar tolyq vaktsınatsııalanǵan bolyp sanalady. Al, AstraZeneca vaktsınasyn eki qabyldaý kerek.

Azamattar qaı vaktsınany alýyn ózi tańdaı alady.

Qazirgi ýaqytta Ózbekstan aýmaǵyndaǵy jappaı vaktsınatsııa aıasynda 1,66 mln doza mólsherdegi vaktsına qoldanylýda.

Sońǵy derek boıynsha Ózbekstanda vaktsına alǵandardyń jalpy sany 49 myńǵa jetken.