Ózbekstanda koronavırýs boıynsha epıdemıologııalyq ahýal jaqsardy

TAShKENT. QazAqparat - Ózbekstanda koronavırýs boıynsha epıdemıologııalyq jaǵdaıdyń jaqsarǵany baıqalady, dep habarlaıdy QazAqparat menshikti tilshisi.

Ózbekstan Respýblıkasy Densaýlyq saqtaý mınıstrliginiń málimetinshe, 18 aqpanda 191 adamda koronavırýs ınfektsııasy anyqtalǵan, bul 146 jaǵdaı tirkelgen 5 qańtardan bergi eń tómengi kórsetkish.

Aıta keteıik, qańtar aıynyń ortasynan beri vırýs juqtyrý kórsetkishi kúnine 1000-1400 adam deńgeıinde boldy. Aqpannyń birinshi onkúndiginde jaǵdaı jaqsaryp, COVID-19 ınfektsııasy anyqtalǵandar sany táýligine 500-ge deıin tústi.
«2022 jylǵy 18 aqpandaǵy jaǵdaı boıynsha Ózbekstanda koronavırýs ınfektsııasyn juqtyrǵandar sany 235 063 (+191) adamdy qurady. Jalpy saýyǵyp ketkenderdiń sany 224458 (+1382), saýyǵý kórsetkishi 95 paıyzdy qurap otyr», - dep habarlady Densaýlyq saqtaý mınıstrligi.

Avtory: Mádibek Jánibekov