Ózbekstanda kóp kitap oqyǵan sheneýnikterge aqshalaı syıaqy berilmek
TAShKENT. KAZINFORM — Ózbekstan prezıdenti Shavkat Mırzıeev «Oqý mádenıetin damytý jáne halyqtyń kitapqa degen qyzyǵýshylyǵyn arttyrý jónindegi sharalar» qaýlysyna qol qoıdy, dep habarlaıdy Kazinform agenttiginiń menshikti tilshisi.
Ádilet mınıstrliginiń málimetinshe, qujattyń negizgi maqsaty — 2030 jylǵa qaraı ár adamdy orta eseppen jylyna 10 kitap oqýǵa daǵdylandyrý, yntalandyrý.
Sondaı-aq, qaýlyda jazylǵandaı, eń kóp kitap oqyǵan memlekettik qyzmetshilerge aılyq jalaqy mólsherinde syıaqy beriledi.
— Mınıstrlikter men vedomstvolarda konkýrs nátıjesi boıynsha eń kóp kitap oqyǵan qyzmetkerge bir aılyq jalaqy mólsherinde aqshalaı syıaqy tólenedi, — delingen Ádilet mınıstrliginiń habarlamasynda.
Qujatqa sáıkes, 1 sáýirge deıin ár memlekettik mekemede «Kitap buryshy» qurylyp, qyzmetkerler úshin aı saıyn «Kitap oqý saǵattary» uıymdastyrylady. Onyń nátıjesi boıynsha mamandardyń reıtıngi qalyptastyrylady.
Eske salaıyq, byltyr Ózbekstan Senaty kitap oqyǵany úshin sottalǵandardyń túrmede otyrý merzimi qysqartýǵa baǵyttalǵan zańdy maquldady.
Qosa ketsek, 2025 jyldan bastap Qazaqstanda Ulttyq kitap kúni toılanyp keledi.