Ózbekstanda kompanııa ashyp jatqan qazaqstandyq ınvestorlardyń qatary kóbeıdi

TAShKENT. KAZINFORM – Naýryz ben mamyr aılarynyń aralyǵynda Ózbekstanda sheteldik kapıtalmen jumys isteıtin 900-den astam jańa kásiporyn quryldy, dep habarlaıdy Kazinform agenttiginiń menshikti tilshisi.

Ulttyq statıstıka komıtetiniń 1 maýsymdaǵy deregine saı, Ózbekstanda sheteldik kapıtalmen 16 405 kompanııa jumys istep tur.

Bul rette qytaılyq kásiporyndardyń úlesi basym. Úsh aıda olardyń qatary 492-ge kóbeıip, jalpy sany 4 068-ge jetti.

Odan keıin 3 086 kompanııamen Reseı tur. Úshtikti Túrkııa túıindeıdi. Atalǵan eldiń kásipkerleri Ózbekstanda 1 997 kásiporyn qurǵan.

Sonymen qatar, qazaqstandyq ınvestorlardyń da belsendigili baıqalady. Atap aıtqanda, úsh aıdyń ishinde bizdiń el Ózbekstanda 54 kásiporyn ashty. Osylaısha, qazir resmı Tashkentte qazaqstandyq kapıtalmen jumys isteıtin kompanııalar sany 1 136-ǵa teńeldi.

Buǵan deıin habarlaǵanymyzdaı, Qazaqstan men Ózbekstan arasynda qosymsha 4 saýda dálizi ashylýy múmkin. Sondaı-aq, Tashkentte Qazaqstannyń, Astanada Ózbekstannyń saýda ortalyǵy salýy yqtımal. Bul rette eki el arasyndaǵy óńiraralyq baılanys nyǵaıyp keledi.

Buǵan qosa, bıyl qańtar-sáýir aılarynyń qorytyndysy boıynsha Qazaqstan Ózbekstannyń negizgi saýda seriktesteriniń úshtiginde qaldy. Qamtylyp otyrǵan kezeńde resmı Tashkent Astanaǵa 405,7 mln dollardyń taýaryn eksporttap, 986,8 mln dollardan astam somaǵa taýar ımporttaǵan. Eki el arasyndaǵy alys-beris 1,4 mlrd dollarǵa jýyqtady.