Ózbekstanda kıim dúkeni órtke orandy
TAShKENT. QazAqparat – Ózbekstannyń Tashkent qalasyndaǵy kıim dúkenderiniń birinen órt shyqty, dep habarlaıdy QazAqparat Ózbekstan Respýblıkasy Tótenshe jaǵdaılar mınıstrliginiń Telegramdaǵy resmı paraqshasyna silteme jasap.
«11 qazan kúni saǵat 08:50-de Tashkent TJB kezekshi bólimine «Uchtepa Outlet Centre» kıim dúkeninde órt shyqqany týraly habarlama tústi. Otqa oranǵan dúken Ýchtepın aýdany, «Farhad» kóshesinde ornalasqan. TJM qutqarý jasaqtary oqıǵa ornyna 3 mınýtta keldi. Dereý áreket etýdiń nátıjesinde saǵat 09:54-te órt tolyq sóndirildi. Órttiń shyǵý sebepteri anyqtalýda», - dep jazdy Ózbekstan Respýblıkasy Tótenshe jaǵdaılar mınıstrligi telegramdaǵy resmı paraqshasynda.
Ózbekstan Respýblıkasy TJM málimetinshe, órt sóndirýge 10-nan astam arnaıy tehnıka jumyldyrylǵan. Al qyzyl jalyn sharpyǵan aýmaq 1500 sharshy metrdi quraıdy.
