Ózbekstanda kezekten tys prezıdent saılaýy ótedi

TAShKENT. QazAqparat – Ózbekstan basshysy Shavkat Mırzıeev elde kezekten tys prezıdent saılaýy ótetinin málimdedi. Ol tıisti jarlyqqa qol qoıylǵany jóninde Olıı Majlıs palatalary, partııalar, sot jáne atqarýshy bılik basshylarymen referendým nátıjesine arnalǵan kezdesýde aıtty. QazAqparat bul týraly Gazeta.uz-ge silteme jasap habarlaıdy.

«Árıne, mundaı sheshimniń qandaı obektıvti qajettiligi bar?» degen suraq týyndaıdy. «Nelikten men prezıdenttik merzimimniń qalǵan 3,5 jylynan

óz betimmen bas tartyp otyrmyn?», - dedi Sh.Mırzıeev.

Óz saýalyna bergen jaýaby: «Ózderińiz kórip otyrǵandaı, bizdiń Negizgi zańǵa sáıkes, birinshiden, bıliktiń barlyq tarmaǵy reformalanady. Olardyń arasynda qarym-qatynas pen balans aıtarlyqtaı ózgeredi.

Ekinshiden, jańartylǵan Konstıtýtsııa prezıdent, parlament, úkimet, mınıstrlikter men hokımder aldyna ýaqyt kúttirmeıtin jańa saıası, áleýmettik jáne ekonomıkalyq mindetter qoıyp otyr.

Úshinshiden, halqymyz bizden barlyq salada asa mańyzdy jáne ózekti ózgerister men reformalar kútedi.

Tórtinshiden, álemde jáne óńirde shıelenisken jáne qıyn protsester bolyp jatqan qazirgi jaǵdaıda, damýdyń durys ári tıimdi jolyn izdestirý jáne iske asyrý eń ózekti, eń mańyzdy másele bolyp otyr».

Eske salaıyq, 6 mamyr kúni Ózbekstannyń Saılaý kodeksine prezıdentti, zań shyǵarýshy palata men Senat depýtattaryn kezekten tys saılaýǵa qatysty ózgerister engizilgen bolatyn.

El prezıdenti kezekten tys saılaýdy jarııalaǵan kúnnen bastap naýqan eki aı merzimi ishinde ótkizilýi qajet.