Ózbekstanda kezekten tys prezıdent saılaýy naýqany bastaldy

TAShKENT. QazAqparat - Ózbekstan Ortalyq saılaý komıssııasy 10 mamyrda ótken otyrysynda kezekten tys prezıdenttik saılaý naýqany bastalǵanyn habarlady, dep habarlaıdy QazAqparat tilshisi.

Ózbekstan Ortalyq saılaý komıssııasynyń málimetinshe, saılaý okrýgterin qurý 15 mamyrǵa deıin, al saılaý ýchaskelerin qurý 25 mamyrǵa josparlanǵan.

Sonymen qatar, respýblıkada saılaýshylardyń biryńǵaı elektrondy tizilimi qurylady.

Saıası partııalar saılaý naýqany jarııalanǵannan keıin 3 kún ishinde ózderiniń ýákiletti ókilderin tirkeý úshin Ortalyq saılaý komıssııasyna ótinish jasaýy tıis.

Saılaýǵa qatysý úshin partııalar 15 mamyrǵa deıin qujattaryn tapsyrýy qajet.

Prezıdenttikke kandıdattar 17 mamyr men 1 maýsym aralyǵynda usynylady. Kandıdattardy tirkeý qujattary 2 maýsymǵa deıin OSK-na tapsyrylýy tıis.

Tirkelý 6 maýsymda aıaqtalady.

Saılaý kodeksine sáıkes, saılaý naýqany bastalǵanǵa deıin tórt aıdan keshiktirmeı elde resmı tirkelgen saıası partııalar prezıdenttikke úmitker bolýǵa quqyly.

Qazirgi ýaqytta Ózbekstanda bes partııa tirkelgen: Ózbekstan halyqtyq demokratııalyq partııasy (HDPÝ), «Mıllıı tıklanısh» partııasy («Ulttyq jańǵyrý»), «Adolat» Sotsıal-demokratııalyq partııasy («Ádilet»), Lıberaldy-demokratııalyq partııa (ÝzLıDeP) jáne ekologııalyq partııa.

Buǵan deıin habarlaǵanymyzdaı, Ózbekstan prezıdenti Shavkat Mırzıeev 2023 jyldyń 9 shildesine belgilengen memleket basshysynyń kezekten tys saılaýyn jarııalady.