Ózbekstanda Qazaqstannan ákelingen 1 mln dollarlyq sıntetıkalyq esirtki tárkilendi
TAShKENT. KAZINFORM — Ózbekstan Memlekettik qaýipsizdik qyzmeti (MQQ) Tashkent oblystyq basqarmasy qyzmetkerleri ishki ister organdarymen birlesip júrgizgen jedel operatsııa barysynda Ózbekstanǵa Qazaqstannan ákelingen sıntetıkalyq esirtki zattary anyqtaldy.
«Naýaı» shekaralyq keden beketi arqyly kirgen Ándijan oblysy Qorǵantepa aýdanynyń turǵyndary, 1983 jáne 1988 jyly týǵan eki azamatqa tıesili medıtsınalyq qural-jabdyqtar tekserilgeni atap ótildi. Nátıjesinde olardyń ishinde jalpy quny 1 mln AQSh dollary bolatyn 4 206 keli «Mefedron» jáne 3 970 keli «Alfa-PVP» sıntetıkalyq esirtkisi jasyrylǵany anyqtaldy.
Jedel áreket jalǵasyp, osy iske qatysty Tashkent qalasy men oblysynda turatyn 1992, 1993, 1995 jáne 2000 jyly týǵan bes azamat ustaldy. Olar Telegram messendjeri arqyly esirtki saýdasymen aınalysqan reseılik azamattyń nusqaýyn oryndaǵany belgili boldy.
«Naýaı» shekaralyq keden beketinde anyqtalǵan taǵy bir oqıǵa boıynsha, 1980 jyly týǵan Qyrǵyzstan azamaty tarapynan arbakesh retinde jaldanǵan azamat Qazaqstannan Ózbekstanǵa gaz plıtasyn ákelgen kezde ustalyp, tintý júrgizildi. Ózbekstanǵa ákelingen gaz plıtasy toqtatylyp, tekserildi. Nátıjesinde gaz plıtasynyń ishinde 1985 keli sıntetıkalyq «Alfa-PVP» sıntetıkalyq esirtkisi anyqtalyp, protsessýaldyq tártipte rásimdeldi. Sonymen qatar jedel áreket etý jalǵasyp, zattaı aıǵaqtarmen atalǵan esirtki zatyn qabyldaǵan kezde Tashkent qalasynda turǵan 2006 jyly týǵan azamat ustaldy.
Eki oqıǵaǵa baılanysty Ózbekstan Qylmystyq kodeksiniń 246 jáne 273-baptary boıynsha qylmystyq is qozǵalyp, tergeý amaldary júrgizilip jatyr.
Eske sala keteıik, BQO-da tórt adamdy óltirgen ózbekstandyq ómir boıyna bas bostandyǵynan aıyryldy.