Ózbekstanda qazaqstandyq kapıtalmen 1200-ge jýyq kompanııa jumys istep tur

TAShKENT. KAZINFORM — Ózbekstanda qazaqstandyq kapıtalmen 1 199 kompanııa jumys istep tur, dep habarlaıdy Kazinform agenttiginiń menshikti tilshisi.

Ulttyq statıstıka komıtetiniń 1 jeltoqsandaǵy deregine saı, kásiporyndardyń qyzmet baǵyttary mynadaı:

* Aýyl, orman jáne balyq sharýashylyǵy - 21 kompanııa;
* Ónerkásip - 129;
* Qurylys - 82;
* Saýda - 492;
* Tasymaldaý jáne saqtaý - 33;
* Qonaqúı jáne qoǵamdyq tamaqtaný salasy - 39;
* Aqparat jáne baılanys - 127;
* Densaýlyq saqtaý jáne áleýmettik qyzmet kórsetý - 13;
* Basqa da qyzmet túrlerin usynatyn kompanııalar - 263.

Toqtala keteıik, búginde Ózbekstanda sheteldik kapıtalmen jumys isteıtin 17 900 kompanııa bar. Bul rette qytaılyq kásiporyndardyń úlesi basym. Byltyr 11 aıda olardyń qatary 1 516-ǵa kóbeıip, jalpy sany 4 873-ge jetti.

Odan keıin 3 209 kompanııamen Reseı tur. Úshtikti Túrkııa túıindeıdi. Atalǵan eldiń kásipkerleri Ózbekstanda 2 109 kásiporyn qurǵan. 
Buǵan deıin habarlaǵanymyzdaı, Qazaqstan men Ózbekstan arasynda qosymsha 4 saýda dálizi ashylýy múmkin.

Sondaı-aq, Tashkentte Qazaqstannyń, Astanada Ózbekstannyń saýda ortalyǵy salynýy yqtımal.

Eske salaıyq, byltyr 11 aıda Qazaqstan men Ózbekstan arasyndaǵy taýar aınalymy 4,3 mlrd dollardan asty.