Ózbekstanda Qazaqstandaǵy VІІ qysqy Azııa oıyndaryna arnalǵan poshta markalary aınalymǵa engizildi
KENT. 10 qańtar. QazAqparat /QUrmat Samarhan/ - Aǵymdaǵy jyldyń 5 qańtarynan bastap Ózbekstanda 7-Qysqy Azıada oıyndary. Astana-Almaty» atty arnaıy eki jańa poshta markasy aınalymǵa engizildi.
Olar - mánerlep syrǵanaý men frıstaıl sportyna arnalǵan, dep jazady Ózbekstannyń buqaralyq aqparat quraldary.
Mánerlep syrǵanaýǵa arnalǵan poshta markasynda muzdaǵy mánerlep bıleý kórinisi beınelengen, markanyń oń jaqtaǵy joǵarǵy buryshynda Astana men Almatyda ótetin 7-Qysqy Azııa oıyndarynyń emblemasy resmı túrde bekitilip, ózbek tilinde latyn qaripimen «7-Qishki osiyo o'yinlari (Astana-Alma-Ata)» degen mátin jazylǵan.
Arnaıy shyǵarylymdaǵy «Frıstaıl» ekinshi poshtalyq markasynda osy sport túriniń úzindi beınesi salynǵan, al markanyń oń jaqtaǵy joǵarǵy buryshynan 7-Qysqy Azıa oıyndarynyń emblemasy men «7-Qishki osiyo o'yinlari (Astana-Alma-Ata)» degen jazýdy kórýge bolady.
Buryn habarlanǵandaı, Azıada oıyndarynyń baǵdarlamasynda sporttyń 11 túri bar. Baıraqty básekede álemniń 30 elinen kelgen sportshylar baq synasady dep kútilip otyr.
