Ózbekstanda Qazaqstan jylyn ótkizýge qatysty birlesken is-sharalardyń jospary bekitiledi
ASTANA. QazAqparat - Tashkentte Qazaqstan men Ózbekstan arasyndaǵy ekijaqty yntymaqtastyq jónindegi Úkimetaralyq komıssııasynyń otyrysy ótedi, dep habarlaıdy QazAqparat tilshisi.
«Osy aptada Tashkentte Qazaqstan men Ózbekstannyń resmı ókilderi arasynda birqatar is-sharalar, sondaı-aq Ortalyq Azııa memleketteri arasynda kópjaqty formatta kezdesýlerdi ótkizý josparlanǵan. Atap aıtqanda, 15 naýryzda Ózbekstan astanasynda Qazaqstan men Ózbekstan arasyndaǵy ekijaqty yntymaqtastyq jónindegi birlesken úkimetaralyq komıssııasynyń 18-shi otyrysy ótedi. Komıssııanyń jumysynda Qazaqstan delegatsııasyn Premer-Mınıstriniń orynbasary Jeńis Qasymbek, al Ózbekstan tarapyn - Premer-Mınıstrdiń Birinshi orynbasary - Kólik mınıstri Achılbaı Ramatov basqarady», - deıdi QR SІM resmı ókili Aıbek Smadııarov vedomstvoda ótken baspasóz máslıhatynda.
Onyń aıtýynsha, otyrystyń kún tártibine ekijaqty saýda-ekonomıkalyq yntymaqtastyq, onyń ishinde eki el arasyndaǵy taýar aınalymyn arttyrý, aýyl sharýashylyǵy, sý-energetıkalyq, ǵarysh jáne aqparattyq salalardaǵy ózara is-qımyl, tranzıt-kóliktik yntymaqtastyq, sondaı-aq óńiraralyq jáne shekara mańyndaǵy baılanystardy damytý máseleleri engizilgen.
Taraptar sondaı-aq mádenı-gýmanıtarlyq, bilim, ǵylym, densaýlyq saqtaý jáne týrızm salalaryndaǵy ekijaqty yntymaqtastyq máselelerin talqylamaq.
«Oǵan qosa, otyrys barysynda 2019 jyly Ózbekstanda Qazaqstan jylyn ótkizý jónindegi birlesken is-sharalar josparynyń qabyldanýy josparlanýda. Qazaqstan men Ózbekstan arasyndaǵy yntymaqtastyq taqyrybyn jalǵastyra kelsek, 2018 jyly eki el arasyndaǵy taýar aınalymy 2 mlrd 488 mln AQSh dollaryn qurady. Bul kórsetkish 2017 jylmen salystyrǵanda 25,3% -ǵa joǵary. Qazaqstannan eksport 31,6 paıyzǵa ósip, 1 mlrd 643 mln dollaryn qurasa, Ózbekstannan ımport 14,8 paıyzǵa ósip, 845 mln dollarǵa jetti», - deıdi ol.
Aıbek Smadııarov sondaı-aq, 15 naýryzda Ózbekstan astanasynda «Ortalyq Azııa kooperatsııasy: ózara tıimdi damý perspektıvalary» taqyrybynda birinshi Ortalyq Azııa ekonomıkalyq forýmy ótetinin habarlady. Іs-sharada Qazaqstan delegatsııasyn Premer-Mınıstrdiń orynbasary Jeńis Qasymbek basqarady. Aıta keterlik jaıt, atalǵan forým Ortalyq Azııa elderiniń basshylary arasyndaǵy 2018 jylǵy naýryzda Astanada ótken alǵashqy konsýltatıvtik kezdesý barysynda qol jetkizilgen ýaǵdalastyq nátıjesinde ótkiziledi.
Sonymen qatar, Forým qarsańynda «Kazakh Export» eksporttyq saqtandyrý kompanııasy» AQ Ózbekstanda óz ókildigin ashady.
