Ózbekstanda Qazaqstan izdeý salǵan 26 qylmysker ustaldy

ASTANA. QazAqparat - Qazaqstan men Ózbekstan Іshki ister mınıstrleri Qalmuhanbet Qasymov pen Pýlat Bobojonov kezdesti, dep habarlaıdy QazAqparat tilshisi.

QR ІІM baspasóz qyzmetiniń habarlaýynsha, Ózbekstannyń Samarqand qalasynda ótken is-shara barysynda eki eldiń ishki ister organdarynyń qylmysqa qarsy kúres salasyndaǵy ózara is-qımylyn nyǵaıtý, shekaralyq yntymaqtastyqty odan ári damytý, praktıkalyq tájirıbe almasý máseleleri, sondaı-aq zań shyǵarý qyzmeti talqylandy. 

«Qazaqstan men Ózbekstan arasyndaǵy yntymaqtastyqtyń damý qarqyny barlyq qyzmet salasynda kórinis tabýda. Sondaı-aq, ishki ister organdary arasyndaǵy yntymaqtastyqtyń da ózindik tájirıbesi qalyptasa bastady. Bizder ekijaqty, sonymen birge birneshe tarap bolyp ta, dálirek aıtqanda TMD jáne ShYU aıasynda da birlesken is-sharalar atqaramyz, kóptegen problemalar Іshki ister mınıstrleri keńesiniń otyrystarynda talqylanady», - dep atap ótti Q.Qasymov.

Qazirgi ýaqytta shekaralas óńirlerde birlesken Іs-sharalar jospary iske asyrylýda. Birlesken is-qımyldar nátıjesinde birneshe aýyr qylmys, qaýipti qylmyskerdi izdestirý jáne quryqtaý operatsııalary sátti oryndalǵan bolatyn. Buǵan qosa, qylmystyq ister boıynsha naqty quqyqtyq kómekter de kórsetildi.

Búginde eki el arasynda birlesken izdestirý jumystary jolǵa qoıylǵan. Máselen, ózbekstandyq áriptesterdiń suraýy boıynsha 2017 jáne aǵymdaǵy jyly Qazaqstan aýmaǵynda 200 qylmysker izdestirildi. Ózbekstan terrıtorııasynda Qazaqstan jaǵy izdestirgen 26 qylmysker anyqtalyp, ustaldy.

Kezdesý barysynda Qalmuhanbet Qasymov ekijaqty yntymaqtastyqtyń bolashaǵyna, shekaralyq qylmys, ekstremızm jáne terrorızmge qarsy kúres boıynsha sharalar qabyldaý jáne barynsha tyǵyz jumys baılanystaryn jolǵa qoıý máselelerine keńirek toqtaldy.

Keńestiń qorytyndysy boıynsha Qazaqstan men Ózbekstan Іshki ister mınıstrlikteriniń Úılestirý tobyn qurý týraly birlesken buıryqqa qol qoıyldy. Atalǵan toptyń quramyna mınıstrlikterdiń beıindik qyzmetteriniń birinshi basshylary saılandy.

Kazaqstandyq delegatsııa basshysy eki eldiń ІІM-niń Úılestirý toby eki taraptyq yntymaqtastyqtyń pármendi mehanızmi bolyp tabylatynyn jáne jedel-qyzmettik jumystyń ártúrli máseleleri boıynsha sharalar qabyldaý jáne jedel qaraýǵa kómektesetinin atap ótti. 

Іs-shara aıasynda Qazaqstan men Ózbekstan ІІM beıindik qyzmet basshylarynyń eki taraptyq kezdesýleri ótkizildi.