Ózbekstanda qaýipti ónerkásip nysandaryndaǵy ereje buzý deregin habarlaǵandar syıaqy alady
TAShKENT. KAZINFORM – 1 tamyzdan bastap jaýapty vedomstvoǵa qaýipti ónerkásip nysandaryndaǵy olqylyqtar týraly foto jáne beınematerıal joldap, habar bergen ózbekstandyqtarǵa aqshalaı syıaqy beriledi, dep habarlaıdy Kazinform agenttiginiń Tashkenttegi menshikti tilshisi.
Mınıstrler kabıneti tıisti qaýlyny qabyldady. Qujatqa sáıkes, azamattar Ónerkásip, radıatsııa jáne ıadrolyq qaýipsizdik komıtetine myna derekter qamtylǵan foto nemese beınematerıal jibere alady:
- ónerkásip, radıatsııa jáne ıadrolyq qaýipsizdik erejelerin buzý faktisi jaıly aqparat;
- nysannyń mekenjaıy, erjege qaıshy árekettiń jasalǵan kúni men ýaqyty.
Óz kezeginde bul materıaldar 3 jumys kúni ishinde qaralady. Keıin jaýapty vedomstvo aıǵaqtar negizinde ákimshilik is qozǵap, zań aıasynda sheshim qabyldaıdy.
Foto jáne beınematerıal usynǵan azamattarǵa Ónerkásip, radıatsııa jáne ıadrolyq qaýipsizdik komıtetiniń paıdasyna óndirip alynǵan aıyppuldyń 20% mólsherinde aqshalaı syıaqy beriledi.
Eske salaıyq, byltyr ózbekstandyq kásiporyndar aýany lastaıtyn shyǵaryndylardy 2 ese qysqartýǵa mindetteldi.
Buǵan deıin habarlaǵanymyzdaı, Ózbekstannyń iri qalalarynda qorshaǵan ortaǵa zalal keltiretin kásiporyndardy ashýǵa tyıym salynady. Munymen birge, el úkimeti qaladaǵy iri kásiporyndardy shet aımaqtarǵa kóshiredi.
