Ózbekstanda qansha otbasy bar ekeni belgili boldy — sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Qytaı men ShYU elderi arasyndaǵy ekonomıkalyq jáne saýda yntymaqtastyǵy rekordtyq deńgeıge jetti — «Halyq gazeti»
Qytaıdyń Bas keden basqarmasynyń deregine sáıkes osy jyldyń alǵashqy jeti aıynda Qytaıdyń Shanhaı Yntymaqtastyq Uıymyna múshe basqa memleketterge ımporty men eksportynyń jalpy quny 2,11 trln ıýanǵa jetken. Bul ótken jyldyń osy kezeńimen salystyrǵanda 3%-ǵa ósip, aýqymy jaǵynan rekordtyq deńgeıge jetti, dep habarlaıdy «Halyq gazeti».
Qytaılyq BAQ-tyń málimetinshe, atalǵan uıymnyń basshylyǵymen ShYU saýda-ekonomıkalyq, ınvestıtsııalyq, ózara baılanystar jáne basqa salalardaǵy yntymaqtastyqty tereńdetip ortaq órkendeý jolyna tústi.
Shandýn ólkesiniń Tsındao qalasyndaǵy Shanhaı Yntymaqtastyq Uıymynyń demonstratsııalyq aımaǵy halyqaralyq avtomobıl kóligimen tasymaldaý ortalyǵynan shyǵatyn jemis-jıdek pen kókónis tıelgen júk kólikteri tikeleı Máskeýge deıin bara alady. Al, Dýbaıǵa jańa toqpen júretin kólikter jiberilip jatyr.
Sonymen qatar Aýǵanstannan jetkiziletin taýarlar da osy jerden Qytaı naryǵyna shyǵady. 2018 jyly qurylysy maquldanǵannan beri demonstratsııalyq aımaq yntymaqtastyq modeliniń jańa túrin turaqty zerttep keledi. Osy ýaqyt ishinde «Jibek Joly elektrondyq kommertsııasy» úshin keshendi qyzmet kórsetý bazasyn daıyndady. Sondaı-aq, «Senimdi ShYU» transshekaralyq platforma ázirlep kásporyndarǵa júıeli sheshý joldaryn usyndy.
Sonymen qatar osy aptada «Halyq gazeti» basylymynda «Beıjińde ShYU-ǵa múshe elderdiń jádigerleri kórsetildi» degen taqyryptaǵy aqparat jarııalandy.
Atalǵan BAQ-tyń málimetinshe, 27 tamyzda Beıjińdegi Qytaı Ulttyq murajaıynda Qytaıdyń Mádenıet jáne týrızm mınıstrligi uıymdastyrǵan «Órkenıet juldyzdar teńizi — Shanhaı Yntymaqtastyq Uıymy elderiniń Ulttyq mýzeıindegi mádenı muralar birlesken kórmesi» ashyldy.
Kórmede ShYU-ǵa múshe memleketterdiń 10 elindegi mádenı jáne kórme mekemelerinen 220 mádenı jádiger qoıyldy. Olar ShYU-ǵa múshe memleketterdiń tereń mádenı murasyn kórsetip, Jibek joly arqyly órkenıetterdiń almasyp, ózara úırenip, ózara ónege alý, bir-birine áser etý syndy tarıhı protsesti kórsetken.
Ózbekstanda qansha otbasy bar ekeni belgili boldy — ÓzA
Memlekettik statıstıka komıtetiniń málimetine sáıkes, 2025 jyldyń 1 qańtaryna qaraı Ózbekstanda jalpy 10 mıllıon 244 myń 241 otbasy tirkelgen. Sonymen qatar, aımaqtar boıynsha otbasylar sanyn jarııalanǵan.
Bul týraly osy aptada «ÓzA» aqparat agenttigi habarlady.
Ózbekstandyq BAQ-tyń dereginshe, Ferǵana oblysynda — 1 177 396 otbasy, Samarqand oblysynda — 1 082 846 otbasy jáne Tashkent qalasynda — 1 011 537 otbasy bar eken. Sondaı-aq qalǵan oblystarda qansha otbasy bar ekeni týraly aqparattardy jazǵan.
«ÓzA»-nyń keltirgen deregine súıensek, 1 shilde jaǵdaıynda Ózbekstannyń turaqty halqy shamamen 37 859 698 adamdy qurady. Bul kórsetkish 2024 jyldyń sáıkes kezeńimen salystyrǵanda 2 paıyzǵa artqan. Onyń ishinde, áıelder sany — 18,8 mln adam, erler sany — 19,1 mln adam. Al qala turǵyndary — 19,3 mln adam bolsa, aýyl turǵyndary — 18,6 mln adam.
Sondaı-aq osy aptada «ÓzA»-da «Tashkent metrosynda jyl sońyna deıin barlyq kassalar jabylady» degen taqyryptaǵy aqparat jarııalandy.
Ózbekstandyq basylymnyń málimetinshe, 2025 jyldyń sońyna deıin Tashkent metropolıteniniń barlyq beketinde bılet satatyn avtomattar ornatylyp, kassalar jabylady.
Metropolıten habarynda aıtylǵandaı, jabylyp jatqan kassalardaǵy operator qyzmet orny birtindep qysqartylýda. Atap aıtqanda, alǵashqy kezeńde 204 kassa operatorynyń shtattyq birligi belgilengen normatıvtik-quqyqtyq qujattarǵa sáıkes qysqartyldy.
Jyl sońyna deıin metropolıtenniń barlyq beketterine avtomattandyrylǵan termınaldar ornatý josparlanǵan. Nátıjesinde Tashkent metrosynda kassa operatory men aǵa operator qyzmetterine qajettilik qalmaıdy.
Irannyń fýtzaldan erler ulttyq quramasy álemde úzdikterdiń qatarynda — Parstoday
Irannyń fýtzaldan erler ulttyq quramasy FIFA-nyń sońǵy reıtınginde álemde besinshi orynda tur, dep jazdy Parstoday aqparat agenttigi.
Parstoday aqparat agenttiginiń habarlaýynsha, Halyqaralyq fýtbol qaýymdastyǵy federatsııasynyń (FIFA) 2025 jyldyń tamyz aıyndaǵy reıtınginde Irannyń fýtzal quramasy álemde besinshi orynǵa turý arqyly óziniń sapasyn kórsetti.
Aıta keteıik, bul reıtıngte Brazılııa, Portýgalııa, Ispanııa jáne Argentına quramalary burynǵysynsha birinshi-tórtinshi oryndardy ıelendi.
Qazaqstan men Qytaı birlesken tuńǵysh telehıkaıany bastady — «Jenmın jıbao»
Qytaı men Qazaqstan birlesken «Kútemin seni ilede» atty telehıkaıasynyń túsirilimi bastaldy.
Soǵan baılanysty Qorǵas memleket qaqpasynyń aldynda túsirý jumysyn bastaýdyń is-sharasyn ótkizgen.
Bul týraly osy aptada qytaılyq «Jenmın jıbao» aqparattyq portaly habarlady.
Qytaılyq BAQ-tyń habarlaýynsha, bul telehıkaıa Іle óńirin áńgimeniń arqaýy ete otyryp, sol jerdegi Mońǵulkúre aýdany, Toǵyztaraý aýdany, Qorǵas aýdany qatarly jerlerge jáne Qazaqstanǵa baryp kórinis alady.
Kórermen nazaryn jańa dáýirdegi jastardyń eseıip-erjetýi men el aralyq dostyqqa aýdaryp, eki eldiń ártúrli túsiniktegi jastarynyń kezdesý, ózara túsinisý, birin-biri qurmetteýi, birlikte jumys isteýi, armanǵa birge umtylýy syndy áserli oqıǵalar baıandalady.
Soǵys saldarynan Gaza balalary úshinshi jyl qatarynan mektepke bara almaıdy — TRT
Izraıldiń Gazaǵa soǵysy anklavtaǵy bilim berý júıesin kúıretti, sebebi Izraıl armııasy soǵys kezinde barlyq bilim berý ınfraqurylymyn zaqymdady nemese joıǵan.
Gaza sektoryndaǵy balalar birneshe kúnnen keıin bastalatyn jańa oqý jylynda da mektepke bara almaıtyn boldy. Bul jaǵdaı qatarynan úshinshi ret qaıtalanyp otyr. Bul týraly BUU-ǵa silteme jasap Túrkııa Radıo Televızııa portaly habarlady.
Birikken Ulttar Uıymy soǵys palestınalyq urpaqty bilim alý quqyǵynan aıyryp jatqanyn aıtyp eskertken.
— Bilim alý — negizgi quqyq, eshbir bala bul quqyqtan aıyrylmaýy kerek. Bilimge qoljetimdilik qorǵalýy tıis. Ol qalpyna keltirilýi qajet, — dedi BUU ókili Stefan Dıýjarrık.
Onyń aıtýynsha, bul daǵdarys «Gaza sektoryndaǵy bútindeı bir urpaqtyń bolashaǵyna qaýip tóndiredi».
«TRT»-nyń dereginshe, Izraıldiń Gaza sektoryndaǵy soǵysy qorshaýdaǵy aımaqtyń bilim berý júıesin kúıretti. Soǵys bastalǵaly beri bilim berý ınfraqurylymynyń 95 paıyzy zaqymdalǵan nemese joıylǵan.
Bul jaǵdaı 660 myńnan astam balany mektepten maqurym qaldyrǵan.