Ózbekstanda qansha qazaq turady

ASTANA. QazAqparat - Ózbekstan Respýblıkasy Prezıdentiniń janyndaǵy Memlekettik basqarý akademııasyndaǵy kafedra meńgerýshisi Mansur Bekmýradov óz elinde turyp jatqan qazaqtar týraly aıtyp berdi, dep habarlaıdy QazAqparat.

«Ózbekstanda 1,5 mıllıonnan astam qazaq ómir súrýde. Bizdiń elde 100-ge jýyq qazaqtyń ulttyq mádenı ortalyqtary qyzmet etýde, sondaı-aq 500-den astam jalpy bilim beretin mektep bar. Atap aıtqanda, qazaq tilinde kadrlar daıarlanyp jatyr jáne ansamblder, teatrlar jasaqtalǵan. Osy oraıda, Ózbekstandaǵy qazaqtarǵa tıisti jaǵdaılar jasalǵan», - dedi sheteldik sarapshy «Qazaqstan jáne Orta Azııa: etnoáleýmettik protsester men etnomádenı baılanys» taqyrybynda  QHA-nyń Ortalyq Azııa ǵylymı sarapshylyq keńesiniń otyrysynda.

Sonymen qatar, ol jaqynda júrgizilgen áleýmettik zertteý nátıjesine toqtaldy. Oǵan sáıkes, ózbek ultyna jatpaıtyn turǵyndardyń 97 paıyzy Ózbekstandy ózderiniń týǵan eli dep sanaıtyndyǵyn jáne eshqandaı da qysym bolmaǵanyn atap ótken.

«Ózderińiz bilesizder, Ortalyq Azııanyń halyqtary toleranttyǵymen, ózge halyqtarǵa degen súıispenshiligimen, olardyń mádenıetine syılastyqpen qaraýmen erekshelenedi. Búgin Astanada Ortalyq Azııa taqyrybynda ótip jatqan otyrys ary qaraı qaı baǵytta damýdyń múmkindikterin jete túsinýge yqpal etedi. Bıyl Ózbekstannyń Qazaqstandaǵy jyly dep belgilengen. Bul óz kezeginde eki eldiń jaqyndasa túsýine múmkindik beredi», - dedi M. Bekmuradov.

Osy oraıda ol aldaǵy jyly Ózbekstandaǵy Qazaqstan jyly bastalatynyn eske saldy.

Esterińizge sala keteıik, 2018 jyl Qazaqstandaǵy Ózbekstan jyly retinde belgilendi.