Ózbekstanda ishinen 16 ıne tabylǵan sábı ońalyp keledi
ASTANA. QazAqparat - Tashkenttik dárigerlerdiń aıtýynsha, ishinen 16 ıne tabylǵan sábıdiń jaǵdaıy jaqsaryp keledi, dep habarlaıdy QazAqparat «Ózbekstan-24» telearnasyna silteme jasap.
Telearnanyń Respýblıkalyq jedel medıtsınalyq járdem ǵylymı ortalyǵynan jasaǵan arnaıy reportajynda bir jasar balanyń jaǵdaıy jaıynda áleýmettik jelide taraǵan túrli qaýesetter shyndyqqa janaspaıtyny, onyń jaǵdaıy turaqtanyp keletini aıtylady.
Ǵylymı ortalyqtyń professory, medıtsına ǵylymdarynyń doktory Habıbýlla Aqılovtyń aıtýynsha, qazir balanyń ómirine qater tónip turǵan joq. Toǵyz saǵatqa sozylǵan ota barysynda 13 ıne alynǵan, al qalǵan úsheýi áli de balanyń aǵzasynda. Biraq olar balanyń ómirine ázirshe asa úlken qaýip tóndirmeıdi. «Bala esin jıǵan. Árıne, jaǵdaıy jaqsy dep aıtýǵa áli erte, biraq onyń ońalyp kele jatqany bizdi qýantady», - deıdi ol.
Aıta ketsek, kun.uz ınternet basylymy 22 qańtarda Ózbekstan respýblıkalyq jedel medıtsınalyq járdem ǵylymı ortalyǵyna jetkizilgen bir jasar Ázızbek Abdýmajıdovtiń denesinen 16 ıne tabylǵanyn habarlaǵan bolatyn.
