Ózbekstanda ınfektsııanyń órshýine baılanysty COVID ortalyqtary ashylýda
Respýblıka astanasynda apta basynda 2 myń oryndyq COVID ortalyqtary ashylǵan. Endi olarǵa qosa Tashkenttiń Ýchtepın aýdanyndaǵy sport saraıy men Ózbek memlekettik álem tilderi ýnıversıteti jataqhanasynyń bazasynda emdeý statsıonarlary ashylýda.
Samarqandta qalalyq sport kesheninde ótken jyly pandemııanyń birinshi tolqynynda ashylǵan COVID ortalyǵy jumysyn qaıta jandandyrdy. Medıtsınalyq ortalyqta naýqastarǵa arnalǵan tósek oryn sany 1 000-ǵa deıin kóbeıtilgeni aıtylady.
«Osyǵan deıin COVID-19 anyqtalǵan naýqastar 340 oryndyq arnaıy aýrýhanalarda em alǵan. Alaıda koronavırýs juqtyrǵandardyń sany kóbeıgendikten, biz ortalyq ashýǵa májbúr boldyq. Munda qalalar men aýdandardan túsken naýqastardy emdeýge qajet barlyq quraldar bar, 100-ge jýyq maman jumys isteýde», - dedi Samarqand densaýlyq saqtaý basqarmasynyń bastyǵy Ahmadjon Bobodjonov.
Sonymen qatar Namangandaǵy «Barkomol avlod» sport kesheniniń bazasynda 400 oryndyq qosymsha statsıonar ashyldy.
«Aýrýdyń órshýinen ortalyqtyń jumysyn qaıta jandandyrý kerek boldy, munda 100-ge jýyq medıtsına qyzmetkeri jumys isteıdi, kerek qurylǵylar men dáriler qorlary bar. Qandaı jaǵdaıda da elektr qýaty úzilmeýi kerek, aýyz sýy men ottegi kelip otyrýy tıis. Barlyq elektr generatorlary daıyn turýy kerek, ottegi qorlary aldyn ala ákelinip otyrýy tıis», - dep nusqaý berdi Namangan oblysynyń basshysy Shavkatjon Abdýrazakov ortalyqty aralaý barysynda.
Eske sala keteıik, osy aptanyń basynda Ózbekstan astanasyndaǵy epıdemologııalyq ahýaldyń órshýinen «Ýzekspotsentr» kórme ortalyǵy men «Ýnıversal» jáne «Ëshlık» sport keshenderiniń bazasynda 2 myń oryndyq kovıd ortalyqtary ashyldy.
