Ózbekstanda II Dúnıejúzilik soǵys ardagerlerine 30 mln sým beriledi
TAShKENT. KAZINFORM — Ózbekstan prezıdenti Shavkat Mırzıeev áskerı qyzmetshilerdi áleýmettik qoldaýǵa baǵyttalǵan sharalar jáne 9 mamyr — Eske alý jáne qurmet kúnine daıyndyq barysymen tanysty, dep habarlaıdy Kazinform agenttiginiń Tashkenttegi menshikti tilshisi.
Keńeste málim bolǵandaı, áskerdiń jaýyngerlik mashyqtaryn shyńdaý maqsatynda turaqty negizde keshendi strategııalyq jáne komandalyq-shtabtyq oqý-jattyǵýlar uıymdastyrylyp jatyr. Sonymen qatar áskerıler qazirgi zamanǵy soǵys qımyldaryn taldaý negizinde urys júrgizýdiń jańa tásilderin meńgerýde.
Buǵan qosa jıynda 9 mamyr — Eske alý jáne qurmet kúnine daıyndyq barysy pysyqtaldy. Bıyl mereke qarsańynda Ekinshi dúnıejúzilik soǵys ardagerlerine 30 mln sým (2 467 dollar) mólsherinde birjolǵy aqshalaı syıaqy beriledi. Munymen birge olar turatyn úılerdiń aýmaǵy abattandyrylyp, túrli eske alý jáne saltanatty is-sharalar ótkiziledi. Táýelsizdik jyldarynda qyzmettik boryshyn atqarý kezinde qaza tapqan áskerı qyzmetshilerdiń esimi de máńgilikke ulyqtalyp, olardyń otbasylaryna materıaldyq jáne moraldyq qoldaý kórsetiledi.
Qosa ketsek, bul kúnderi Ózbekstan men Úndistan birlesken áskerı oqý-jattyǵý ótkizip jatyr.
Buǵan deıin habarlaǵanymyzdaı, Ózbekstanda áskerı boryshyn ótep júrgen sarbazdarǵa JOO-da qashyqtan oqý múmkindigi usynylmaq.
