Ózbekstanda haıýanattar baǵyndaǵy tordan shyǵyp ketken 3 arystan kúzetshini talap óltirdi

TAShKENT. KAZINFORM – Tashkent oblysynyń Parkent aýdanynda ornalasqan Lion Park haıýanattar baǵynda 3 arystan tordan shyǵyp ketip, kúzetshige shabýyl jasady, dep habarlaıdy Kazinform agenttiginiń menshikti tilshisi.

Oblystyq ishki ister basqarmasynyń málimetinshe, oqıǵa tańǵy saǵat 05:00 shamasynda bolǵan. Bir tordyń ishinde qamalyp turǵan 3 arystan qorshalǵan aýmaqtan shyǵyp ketken. Bul ýaqytta haıýanattar baǵy kelýshiler úshin jabyq edi.

Jyrtqyshtardy torǵa qaıtarýǵa tyrysqan 44 jastaǵy kúzetshige arystandar shabýyl jasaǵan. Saldarynan er adam kóz jumdy.

Keıin haıýanattar baǵynyń qyzmetkerleri arystandardy arnaıy torǵa qaıta qamady.

Bas prokýratýranyń baspasóz qyzmetinen habarlaǵandaı, mamandar 2 arystandy trankvılızatordyń kómegimen torǵa qamap, úshinshisin atyp óltirgen.

Oqıǵadan keıin haıýanattar baǵynyń qyzmetkerleri barlyq jyrtqyshtardyń ornalasqan orynyna tekseris júrgizgen. Jergilikti bılik ókilderi málim etkendeı, halyqqa eshqandaı qaýip joq, kúzetshiden basqa eshkim zardap shekpegen.

Eske salaıyq, keler jyldan Ózbekstandaǵy tsırkterde jabaıy janýarlardy paıdalanýǵa tyıym salynady.