Ózbekstanda halyq sany kún saıyn 2 myń adamǵa ósip jatyr
TAShKENT. QazAqparat – Ózbekstan halqynyń sany kún saıyn 2 myń adamǵa ósip jatyr, dep habarlaıdy QazAqparat menshikti tilshisi.
Ózbekstan Respýblıkasynyń Statıstıka agenttiginiń málimetinshe, 2023 jyldyń 1 shildesindegi jaǵdaı boıynsha respýblıkanyń turaqty halyq sany 36 372 276 adamdy quraǵan. Bul jyl basyndaǵy kórsetkishten 347,3 myń adamǵa artyq.
«Respýblıkamyzdyń turaqty halyq sany ótken jyldyń osy kezeńimen salystyrǵanda 2,2%-ǵa artqan. Ózbekstan halqy 2023 jyldyń ár aıynda orta eseppen 57,9 myń adamǵa ósken. Kún saıyn bul kórsetkish 1,9 myń adamǵa artyp otyr», - deıdi agenttik.Vedomstvodan málim etkendeı, respýblıkada 18 306,3 myń er adam men 18 066,0 myń áıel turady. Qala turǵyndarynyń sany - 18 557,5 myń adamdy, aýyl turǵyndarynyń sany - 17 815,8 myń adamdy quraǵan.
Buǵan deıin habarlaǵandaı, Ózbekstannyń turaqty halyq sany 100 jylda 8 esege ósken.
