Ózbekstanda halyq sany bir jyldyń ishinde jarty mıllıonǵa kóbeıgen
ASTANA. QazAqparat - 2017 jyly Ózbekstannyń halyq sany jarty mıllıon adamǵa ósip, 2018 jyldyń basynda 32 mln 653 myń adamǵa jetken, dep habarlaıdy «QazAqparat» HAA ÓR Memlekettik statıstıka komıtetine silteme jasap.
Atap aıtqanda, 2018 jyldyń 1 qańtaryndaǵy jaǵdaı boıynsha Ózbekstannyń turaqty halyq sany 32 mln 653,9 myń adamdy quraǵan jáne 2017 jyly 533,4 myń adamǵa (1,7%) kóbeıgen.
Qaladaǵy halyq sany 16 mln 533,9 myń adam (nemese 50,6%), aýyl halqynyń sany 16 mln 120 myń adam (49,4%) bolǵan.
Ózbekstandaǵy halyq sany kóp shoǵyrlanǵan óńiri Samarqand oblysy (3719,6 myń adam) bolyp tanyldy. Odan keıin Ferǵana - 3620,1 myń, Qashqadarııa - 3148,1 myń jáne Ándijan - 3011,6 myń adam.
